Úkili úzdikterdi marapattaý rásimin Astana qalasynyń bilim basqarmasy men Oqýshylar saraıy uıymdastyrdy. «Elorda maqtanyshy» atty merekelik keshte sonymen qatar halyqaralyq týrnırler men olımpıadalardyń júldegerleri de syı-syıapatqa ıe boldy. Atalǵan sharaǵa elordanyń qurmetti azamattary, estrada ónerpazdary, mektep ustazdary men ata-analar qatysty.
Saltanatty jıynda atalyp ótkendeı, bıyl sondaı-aq 373 túlek úzdik attestat alǵan. Qala basshysy túlekterdi quttyqtaı otyryp, elorda úzdikteriniń respýblıkalyq, halyqaralyq olımpıadalar men ǵylymı jobalar konkýrstarynda 281 medal, sonyń ishinde 121 altyn, 66 kúmis, 94 qola medal jeńip alǵanyn atap ótti.
«Bıyl mektepterden daryndy balalar túlep ushýda. Mysaly, Astanadaǵy №9 «Zerde» daryndy balalarǵa arnalǵan mekteptiń oqýshysy Nurálı Sarbaqyshty birden álemniń 7 ýnıversıteti oqýǵa shaqyrdy. Al Álıhan Qudaıbergenov pen Erarslan Shaıahmetov – matematıkadan barlyq halyqaralyq olımpıadalardyń jeńimpazdary. Kemel Nurdáýlet fızıkadan barlyq halyqaralyq olımpıadalarda altyn medal jeńip alǵan. №60 mektep-lıseıde bilim alǵan Vandeıkastel Sıntııa Sýlýý fransýz tilinen respýblıkalyq olımpıadanyń altyn medal ıegeri atanǵan. Mundaı bilimdi oqýshylar sany jyl ótken saıyn artyp keledi. Árıne, bul bizdi qýantady. Biz olardy maqtan tutamyz», dedi Á.Isekeshev.
Ákimniń aıtýynsha, bıyl suranysy joǵary mamandyqtar boıynsha joǵary oqý oryndaryna 1 myń grant bólinedi. Olardyń ishinde web-dızaınerler, bim-menedjer-jobalaýshylar, IT-mamandar, qurylystaǵy 3D-baspa jobalaýshylary, ınjener-elektronshylar bar. Atalǵan mamandyqtarǵa astanalyq alǵyr oqýshylardyń kedergisiz túsetinine kemel bolashaqty jastardyń ózderi dálel.
Bıyl mektep bitirýshi astanalyq túlekterdiń jalpy sany 6229 oqýshy ekenin de aıta ketken jón.
Mıras ASAN,
«Egemen Qazaqstan»
