Kórsetilim aldynda kórermenge Qazaqstan týraly áńgimelegen elshilik ókilderi, sondaı-aq Italııanyń mádenıet jáne óner qaıratkerleri Qazaqstan men Astana qalasynyń damýy deńgeıine jáne otandyq kınematografııa salasyna joǵary baǵa berdi.
Italıan tilinde sýbtıtrleri bar fılmdi tamashalaǵan kórermender qazaq halqynyń tarıhyna qyzyǵýshylyqtaryn bildirdi. Aıta ketsek, Rımniń tarıhı aýdandarynyń birinde ornalasqan Casa del Cinema kınoteatrynda bul kúni bos oryn bolmady. Jınalǵan ónersúıer qaýym otandyq kınotýyndylardy jyly qabyldap, budan keıin de qazaq mádenıeti jáne ónerimen etene tanysqysy keletin nıetin bildirdi.
Qazaq handyǵynyń 550 jyldyǵyna oraı túsirilgen «Qazaq handyǵy» serıalynyń kınonusqasy – «Almas qylysh» fılmi Qazaqstan táýelsizdiginiń 25 jyldyǵyna oraı eń alǵash Astana qalasynda kórsetilgen bolatyn. Aýqymdy jobanyń ıdeıasy el Prezıdenti N.Nazarbaevqa tıesili. Tarıhı fılmder túsirýden tájirıbesi tolysa bastaǵan qazaqstandyq rejısserlerdiń ulttyq tanym men qazaqy qaınarǵa toly týyndysymen tanysqan soń ıtalııalyqtar memleket qurǵan aıbarly halyqtyń erligine qýana qol soqty.
Aǵylshyn jazýshysy Djeremı Vılsonnyń Qazaqstan Prezıdenti Nursultan Nazarbaevtyń ómirbaıanyn jazý úshin onymen kezdesýge qol jetkizip qana qoımaı, bul suhbattyń sońy búkil eldi aralaýǵa, tarıhqa kóz júgirtken uzaq ýaqytqa sozylǵan qyzyqqa toly saıahatpen ushtasqanyna ıtalııalyqtar «Juldyzdar toǵysqanda» fılmi arqyly kýá bolyp, táýelsiz jas memlekettiń qalyptasýynyń kórkem shejiresin az ýaqytta sholyp shyqty.
Al romantıkalyq komedııany joǵary baǵalaıtyn ıtalııalyqtar ulttyq dástúrge negizdelgen, izgilikke toly «On alty qyz» fılminen ózderi úshin sony jańalyq taýyp, ǵajap áserge bólengenderin jarysa jetkizip jatty.
Kórsetilimnen keıin qonaqtar Qazaqstan men Astana qalasy týraly daıyndalǵan otandyq ımıdj beınematerıaldardy tamashalady.
Aıgúl AHANBAIQYZY,
«Egemen Qazaqstan»
ALMATY
