Kámeletke tolmaǵandardyń qaıtys bolýynyń negizgi sebepteri: sýdaǵy qaýipsizdik erejelerin saqtaý boıynsha túsindirme jumystardyń jetkiliksizdigi, balalardy eresekterdiń qadaǵalaýynsyz qaldyrý, sýarý aǵyndaryn, kanaldardy, sý qoımalaryn qaýipsizdikpen jetkilikti qamtamasyz etpeý.
Osyndaı jaǵdaılardyń saldarynan ótken jyly 29 bala qaıtys boldy. Sonyń ishinde Almaty oblysynda bir mezgilde bir otbasyndaǵy úsh bala sýǵa ketti. Olar úıinen 300 metr jerde ornalasqan sýarý aryǵyna oıyn kezinde abaısyzda qulap ketken.
О́kinishke qaraı balalardy qaraýsyz qaldyrý faktileri de jıi bolady. Biz jazǵy demalys aılarynda balalarymyzdyń qaýipsizdigine alańdaýshylyq bildiremiz. Bıylǵy statıstıkaǵa júginsek, shomylý maýsymy bastalmaı jatyp, 15 bala sýǵa ketken. Olardyń 13-i eresekterdiń qadaǵalaýynsyz qalǵan jas balalar.
Biz bul máselege bılik tarapynan nazar aýdarylýy kerek dep sanaımyz. Sondyqtan Úkimet basshysy B.Saǵyntaevtyń atyna depýtattyq saýal joldap, osyǵan qatysty aqparat berýin ótindik.
Atap aıtqanda, sý obektilerindegi kámeletke tolmaǵandardyń qaýipsizdigin qamtamasyz etý úshin qabyldanatyn aldyn alý sharalary týraly, aýdandyq jáne aýyldyq ákimdikterdiń sýdaǵy qaıǵyly oqıǵalardyń aldyn alý boıynsha túsindirý jumystaryn júrgizýi týraly (sýǵa batqan adamdar óliminiń kóp bóligi aýyldyq jerlerde tirkelgen), jergilikti polısııa qyzmetiniń jumysy týraly jáne sýdaǵy qaýipsizdik erejeleriniń talaptaryn saqtamaǵany, buzǵany jáne sýdy paıdalanýdyń jalpy erejelerin buzǵany úshin Ákimshilik quqyq buzýshylyq týraly kodekstiń baptaryna sáıkes jeke tulǵalardyń jaýapkershilikke tartylýy týraly aqparat berýdi suraımyz.
Sáýle AITPAEVA,
Senat depýtaty
