Jan-júregimizben qýanaıyq

Shyraıly-shuǵylaly, peıili keń, meıiri mol turǵyndary bar, qaıyrymdy qala Shymkentińiz ben túrki áleminiń tekti tóri, eli­miz­diń rýhanı astanasy Túrkis­ta­­nyńyzǵa baılanysty ulan-asyr, aqjarylqap, aqjoltaı qýa­nysh­y­myz qutty bolsyn! Uzaǵynan súıindirsin.

Jasampaz Jarlyǵyn jarııalarda Elbasymyz eki aýyz sózben-aq Shymkentke de, Túrkistanǵa da aıryqsha anyqtamalar aıshyqtap, basty-basty maqsattar men mindet­ter­di aıqyndap berdi.

Túrkistan topyraǵynda uly shaıyrymyz, danyshpan oıshylymyz, teńdesi joq dindar ustazymyz Ahmet Iаsaýıdiń, nebir handarymyz ben sultandarymyzdyń, bı­lerimiz ben batyrlarymyzdyń, qol­basshy qaıratkerlerimizdiń asyl súıekteri jatyr. Túrki dú­nıe­­sine ortaq tór, Qazaq han­dy­ǵynyń astanasy bolǵan, Uly Ji­bek jolynyń boıyndaǵy ulyq qalanyń, Túrkistannan Túrki­basyǵa, Myrzashól – Maqtaaraldan Otyrar – Sozaqqa sozylyp jatqan ýá­laıa­ttyń, shýaqty Shymkent sha­ha­­rynyń keleshegi kemel, bola­sha­ǵy berekeli.

Ahmet Iаsaýı babamyz: «О́z dinińdegini dos tut, ózge dinderdegini de dushpan tutpa» degen. Sóıtip túrki tiline, musylman dinine qaltqysyz qyzmet etpektiń óshpes ónegesin tanytqan. О́lmes mura­lar qaldyrǵan. Alash ardaq­ty­lary Túrkistan deıtuǵyn ataý­dy tý etip kótergen, máńgilik et­pek­ti armandaǵan. Minekıińiz, endi sol ar­mandar men ańsarlar oryndalyp oty­rypty.

Oblysymyzdyń Túrkistan ata­lýy, Shymkentimizdiń joǵary már­tebe alýy, Maqtaaral men Saryaǵashta eki birdeı aýdannyń en­shi bólisip, óz aldaryna otaý ti­gýi – munyń bári de rýha­nı jań­ǵy­rýymyzdyń naqty nátı­je­leri. Jeńisteri men jemisteri.

Bázbir kisiler Ońtústik Qazaqstan ataýyn qımaımyz dese­di. Qımastyq – qasıetti sezim. Alaı­da Túrkistan uǵymy – uly uǵym. Ońtústik degen uǵym da alash­tyń aýyzeki aqyndar aıtysy sekil­di aýyzeki túrde aıtyla berer. Mem­leket basshysy táýelsizdiktiń áýel­gi jyldarynda: «Ońtústikte bir­lik-yntymaq, baq-bereke bolsa, búkil Qazaqstanymyzda birlik-yntymaq, baq-bereke bolady» degen.

Keshegi OQO, búgingi Túrkistan oblysynyń, Shymqalanyń basshy­laryna da, qosshylaryna da, búkil jurtshylyǵyna da joǵary jaýapkershilik júktelip otyr. Ol – Ulystyń uıytqysy, altyn qur­saq­ty aımaq atyna burynǵydan be­­ter berik te bekem bolmaq, bir­lik pen yntymaqty kózdiń qara­shy­ǵyndaı saqtap, jumyla jumys iste­mek jaýapkershiligi.

Qazaq elinde qýanyshtar kóbeıe bersin.

Marhabat BAIǴUT,

jazýshy, Qazaqstannyń eńbek sińirgen qaıratkeri