Sharaǵa Kásipodaqtar federasııasynyń Áleýmettik-ekonomıkalyq máseleleri jáne áleýmettik áriptestik jónindegi komıtet tóraǵasy Satybaldy Dáýletalın, «Atameken» ulttyq kásipkerler palatasynyń Áleýmettik sala jáne áleýmettik áriptestik komıtetiniń tóraǵasy Talǵat Doskenov jáne Jumys berýshiler konfederasııasynyń atqarýshy dırektory Valentına Breýsova qatysyp, aksııa týraly keńinen áńgimelep berdi.
Aksııanyń negizgi maqsaty – eńbekti qorǵaý sharttaryna, óndiriste tótenshe jaǵdaılardyń aldyn alý, jumys berýshilerdiń jumysshylarǵa laıyqty jáne qaýipsiz eńbek sharttaryn qalyptastyrýǵa múddeli bolýy, ujymdyq áleýmettik jaýapkershilikti damytý, eńbekti qorǵaý máselelerine jumysshylardyń keńinen qatysýyn qamtamasyz etý, kópshiliktiń nazaryn aýdarý.
Halyqaralyq derekter uıymynyń resmı málimeti boıynsha, álemde kún saıyn alty myńnan astam adam óndiriste qaıtys bolady. Al jastardyń arasyndaǵy jazataıym oqıǵa, eresekterge qaraǵanda 40 paıyzǵa kóp.
Satybaldy Dáýletalınniń aıtýynsha, elimizde óndiristegi jazataıym oqıǵalardyń sany jyl saıyn azaıyp kele jatyr. «2018 jyldyń alǵashqy jartyjyldyq qorytyndysy boıynsha 579 jazataıym oqıǵa tirkelip, 70 adam qaıtys bolǵan. Biraq ótken jylmen salystyrǵanda azaıyp kele jatyr. Jazataıym oqıǵalardyń basym bóligi metallýrgııa, qurylys salasynda bolady», deıdi ol.
Sondaı-aq Respýblıkalyq Kásipodaqtar federasııasynda bıylǵy jyldy «Eńbek qaýipsizdigi jáne eńbekti qorǵaý jyly» dep jarııalady. Bul bastama eńbek qaýipsizdigi jáne eńbekti qorǵaý salasynda eńbek zańnamasynyń saqtalýyna qoǵamdyq baqylaýdy kúsheıtýge baǵyttalǵan. Áleýmettik seriktestermen qolǵa alynǵan aksııanyń qorytyndysyn shyǵarý kelesi jyldyń jeltoqsan aıyna josparlanǵan.
Álı BITО́RE,
«Egemen Qazaqstan»
