Eńbek jáne xalyqty áleýmettik qorǵaý vıse-mınıstri Svetlana Jaqypovanyń aıtýynsha, bazalyq zeınetaqynyń mólsheri eńbek ótili men zeınetaqy júıesine qatysý merzimine táýeldi bolady. Búginde bazalyq zeınetaqy barlyǵyna birdeı tólenip otyr. Al onyń mólsheri eń tómengi kúnkóris deńgeıiniń 54 prosentin quraıdy. Ol - shamamen 15 274 teńge. Endi, bazalyq zeınetaqy eńbek ótili men zeınetaqy júıesine qatysý merzimine qaraı tólenedi.
«Máselen, zeınetkerdiń eńbek ótili bolmasa, sosyn zeınetaqy jınaqtaý júıesine múldem qatyspasa, ıa bolmasa, eńbek ótili 10-aq jyl bolsa, oǵan jańaǵy eń tómengi kúnkóris deńgeıiniń 54 prosentin - 15 274 teńgeni tólene beredi. Al 10 jyldan artyq eńbek ótili bar adamǵa qosymsha árbir jyl úshin 2 prosent qosylady. Sonda 33 jyldyq eńbek ótili bar adam bazalyq zeınetaqynyń tolyq mólsherin - 28 284 teńgeni ala alady. Árbir adam óziniń zeınetaqy mólsherin «elektrondy úkimet» portalynan, ıa bolmasa, «Azamattarǵa arnalǵan úkimettiń» front-keńselerinen bile alady. Sol jerde tolyq anyqtamany da alýǵa múmkindik bar. Búginde qaıta esepteý sharalary atqarylyp, árbir adamnyń zeınetaqysy avtomatty túrde belgilendi. Sondyqtan qosymsha qujattardy ákelýdiń qajeti joq», - deıdi S.Jaqypova.
Budan bólek, belgili bir sebepterge jınaqtaýshy zeınetaqy júıesine qatysa almaǵan keıbir azamattarǵa jeńildik jasalady, olardyń jumyssyz júrgen jyldary eńbek ótili dep jazylady. «Birinshiden, bala kútimimen úsh jyl júrip qalǵandarǵa atalǵan ýaqyt eńbek ótili dep jazylady. Biraq ol ýaqyt 12 jyldan aspaýy tıis. Sol sııaqty I jáne II toptaǵy múgedekterge, sondaı-aq, 80 jastan asqan adamdarǵa kútip jasaǵandarǵa da eńbek ótili jazylady. Sosyn áskerı adam qyzmet babyna baılanysty basqa bir jerge jiberilse, al ol jerde onyń jubaıyna jumys tabylmasa, onyń da ótkizgen ýaqyty eńbek ótiline jatqyzylady. Dıplomattardyń jubaılaryna da týra sondaı jeńildik jasalady», - dep atap kórsetti S.Jaqypova.
Resmı málimetke sáıkes, qazirgi kezde Qazaqstanda 2 mln 148 myń adam bazalyq zeınetaqy alyp júr. Olardyń 44,5 prosenti, naqty aıtsaq, 940 myń adam bazalyq zeınetaqynyń tolyq mólsherin, ıaǵnı 28 284 teńgeni alady. Sosyn 931 myńǵa jýyq zeınetker eń tómengi kúnkóris deńgeıine jaqyn 74-90 prosentin alady. Qalǵan 120 myń adam eń tómengi kórsetkish - 15 274 myń teńge ala beredi. Sebebi olardyń eńbek ótili 10 jylǵa da jetpeıdi. Bazalyq zeınetaqyny kóterýge respýblıkalyq bıýdjetten 530 mlrd teńge bólinip otyr.
