Ulttyq dombyra kúnine baılanysty Oral qalasyndaǵy saltanat Qurmanǵazy men Dına eskertkishine gúl shoǵyn qoıýdan bastaldy. Odan keıingi negizgi kópshilik shara Qazaqstan Respýblıkasy Tuńǵysh Prezıdenti alańynda jalǵasty.
Oraldyń ortalyq alańyndaǵy Qadyr aqynnyń eskertkishine gúl shoǵyn belgili dombyrashy Edige Nábıev pen Batys Qazaqstan oblysy ákiminiń orynbasary Ǵabıdolla Ospanqulov bastap qoıdy. Odan keıin merekelik konsert bastaldy. Qazaqy dástúrmen bezendirilgen sahnada oblystyń belgili óner ujymdary, jyrshy-termeshiler, dombyra sheberleri ən-kúı tókti. Ǵabıdolla Ospanqulov óz sózinde «rýhanı jańǵyrýdyń naǵyz úlgisi – dombyrany ulyqtaý ekenin» aıtty. Dombyraǵa qurmet Aq Jaıyq óńirinde burynnan erekshe. Máselen, sońǵy jyldary oblys aýmaǵyndaǵy orta mektepter úzilis kezinde dástúrli qońyraýdyń ornyna kúı áýenderin jappaı paıdalana bastaǵan.
* * *
Ulttyq dombyra kúnine baılanysty Oral qalasynda ótken erekshe sharanyń biri – qalalyq perzentqanada jas bosanyp jatqan analarǵa jasalǵan qurmet boldy. Batys Qazaqstan oblysy Qazaqstan halqy Assambleıasynyń músheleri oblys əkiminiń orynbasary Ǵabıdolla Ospanqulovpen birge kópbeıindi qalalyq aýrýhananyń perzenthanasyna baryp, dombyramen əýeletip án salyp, shaǵyn konsert qoıyp berdi. «Dýdar-aı» ánin shyrqaǵan Ǵabıdolla Abdollauly búgingi merekeniń mańyzyn túsindirip, kıeli óner urpaqqa mıras bolyp qalatynyn aıtty. Bul kúni dúnıege sábı ákelgen 15 ana gúl shoǵymen birge bir-bir kıeli dombyrany syıǵa alyp, máz bolyp qaldy.
* * *
Ulttyq dombyra kúnine oraı uıymdastyrylǵan sharalar Batys Qazaqstan oblysynyń ár túkpirinde de ótti. Syrym aýdanynyń ortalyǵy Jympıtydaǵy shara «Naǵyz qazaq qazaq emes, naǵyz qazaq – dombyra!» dep ataldy. Aýdandyq balalar men jasóspirimder shyǵarmashylyǵy ortalyǵy dombyra merekesin aqyn Qadyr Myrza Álıdiń eskertkishi turǵan alańda ótkizýdi uıǵarypty. Munyń sebebi de bar: qazaq ádebıetinde dombyraǵa Qadyr aqyndaı dál, Qadyr aqyndaı týra, ári Qadyrdaı tabıǵı teńeý aıtqan adam joq. Onyń «Naǵyz – qazaq dombyra!» atty sózi búgingi kúni halyqtyq sózge aınaldy.
Syrym aýdandyq balalar men jasóspirimder shyǵarmashylyǵy ortalyǵynyń jas ánshisi Ábilmansur Qanat, aýdandyq saz mektebiniń jas dombyrashylary Bernar Joldyǵalı, Dinmuhamed Qumarǵalı jáne jas aqyndar Álıjan Keńes pen Dılnaz Súleımenova óner kórsetken shara kópshilik kóńilinen shyqty. Qosymsha bilim berý pedagogy, sýretshi Musa Sultanǵalıev dombyranyń qurylysy, onyń ataýlary týraly baıandapberdi. Shara kórermendiń flesh- mobymen aıaqtaldy.
* * *
Keshe ǵana Aqjaıyq aýdanynyń Shabdarjap eldimekeninde paıdalanýǵa berilgen sý jańa mektep ujymyna osy mektepti ár jyldary bitirgen túlekter 10 dombyra tartý etti.
- Aýylymyzda sý jańa mektep ǵımaraty salynyp, paıdalanýǵa berilgenine barsha shabdarjaptyqtar júregi jaryla qýanyp jatyr. Osy qýanyshty oqıǵa Astana qalasynyń 20 jyldyǵymen jáne tuńǵysh ret atap ótilgeli otyrǵan Ulttyq dombyra kúnimen oraılas kelip otyr. Aýylymyzdyń balalary jan-jaqty ónerli bolsyn, ulttyq qundylyqtardy boıyna sińirip óssin dep biz mektep ujymyna sý jańa on dombyra tartý etkendi jón kórdik, - deıdi aýyl mektebin 28 jyl buryn támamdaǵan Aqmaral Muratqyzy.
Qazbek QUTTYMURATULY,
«Egemen Qazaqstan»
Batys Qazaqstan oblysy
Sýretterdi túsirgen Dınara AMANǴALI
