«Nur Otan» partııasy qaıta jańǵyrtylǵan Nur Otan Talks jobasyn ótkizdi

Onlaın rejimde sóz alǵan spıkerler Astananyń qalyptasý kezeńine, onyń tarıhy men damý baǵyttaryna toqtalyp, ózderiniń jeńisterin bas qalanyń jemisti jyldarymen baılanystyratyndaryn jetkizdi.

Partııa Saıası keńesiniń soń­ǵy otyrysynda Elbasy, partııa Tóraǵasy jańa partııalyq joba­­lar men jumys baǵytyn maqul­­dap, naqty tapsyrmalar bergen bolatyn. Buǵan deıin de Mem­leket basshysynyń partııa qyzmetin jańǵyrtý jóninde tıisti maqsat-mindetterdi aıqyn­dap bergeni belgili. Nur Otan Talks erkin pikirtalas alańy sonyń aıasynda qolǵa alynyp, qaıta ja­ńǵyrtylǵan jobalardyń biri.

Is-sharany ashqan «Nur Otan» partııasy Tóraǵasynyń birinshi orynbasary Máýlen Áshimbaev partııa qyzmetindegi túbegeıli ózgeristerge osyndaı tyń bas­tamalar aıqyn dálel ekenin aıtty. Onyń aıtýynsha, sońǵy aılarda partııalyq jańǵyrý aıasynda Elbasynyń tapsyrmasymen jańa 22 joba qolǵa alynyp, olardy júzege asyrý jumystary qarqyndy júrgizilýde.

– Jalpy, biz búginde partııa­nyń jumysyn qazirgi zamanǵa beıimdep, zamanaýı úrdisterdi eskerip, jumysy­myzdy jańa qarqynmen, tyń serpilispen júrgizýge úlken basymdyq berip otyrmyz. Sondaı-aq partııanyń ashyqtyǵyn qamtamasyz etý úshin aqparattyq keńistiktiń aıasyn keńeıtip, jańa tehnologııalar men múmkindikterdi molynan paıdalanýdy qolǵa aldyq. Odan bólek, osy baǵytta birqatar jańa jobalarymyz da bar. Olardyń biri Nur Otan Trends jobasy bilikti sarapshylar bas qosyp, qoǵamdaǵy ekonomıkalyq, áleýmettik máse­lelerdi talqylap, olardyń sheshý joldaryn qarastyratyn alańǵa aınaldy. Sonymen qatar Nur Otan Talks atty jobamyzdy da qaıta jańǵyrtyp, ony jańa ekpinmen júrgizýdi bas­tap otyrmyz. Bul jobanyń negizgi maqsaty – qoǵamda durys qundylyqtar­dy qalyptastyrýǵa partııa tarapynan úles qosý, – dedi Máýlen Áshimbaev.

Sonymen qatar M.Áshim­baev barsha qatysýshy­lardy elordamyzdyń 20 jyl­dy­ǵymen quttyqtap, onyń búkil qazaqstandyqtar úshin úlken mereke ekenine nazar aýdardy. Rasynda Astana – táýel­sizdik jyldaryndaǵy eń bas­ty jeńisimiz jáne jetisti­gimiz. Bas qalamyz tek ásem ǵımarat­tarymen ǵana emes, sondaı-aq básekege qabiletti halqymen de erekshe.

Shyn máninde, elordamyz talaı jannyń bıikterdi ba­ǵyn­dyryp, armandaryna qol jetkizýinde úlken ról atqarǵany sózsiz. Sondyqtan munda sondaı jandar, atap aıtqanda, tarıhshy, saıasattanýshy, «Kıeli Qazaqstan» ǵylymı-zertteý ortalyǵy­nyń jetekshisi Berik Ábdiǵalı­uly, Qazaqstan Respýblıkasynyń eńbek sińirgen qaıratkeri, «Astana Opera» memlekettik opera jáne balet teatrynyń je­tek­shi solısi Mádına Basbaeva, «Qasıetti jol» qaıyrymdylyq qory­nyń negizin qalaýshylardyń biri Dınara Zakıeva jáne dańqty shahmatshy, halyqaralyq grossmeıster Dármen Sádýaqasov jetistik pen jeńis jolyndaǵy ózderiniń tarıhyn aıtyp berdi.

Shara sońynda «ashyq mıkrofon» aıdary boıynsha qa­tysýshylar spıkerlerge ózderin tolǵandyrǵan suraqtaryn qoıyp, óz pikirlerin bildirdi.

Joldybaı BAZAR,
«Egemen Qazaqstan»