Bul iste respýblıka óńirleri arasynda Aqtóbe oblysy kósh bastap keledi. Aıtalyq qazirgi kezde aımaqta MJÁ sheńberinde 127 joba júzege asyrylýda. Onyń jalpy quny 31 mıllıard teńgeden asyp túsedi.
Búgingi kúni atalǵan jobalar ártúrli atqarylý kezeńinde tur. Onyń keıbiri tirkelý deńgeıinde bolsa, birqataryna konkýrs jarııalanǵan. Sondaı-aq jobalaý satysynda turǵandary da bar. Basym kópshiligine túbegeıli kelisim jasalyp, qol qoıylǵan. Atap aıtqanda, MJÁ aıasyndaǵy nysandardyń qataryn muz sport saraıy, oftolmologııa ortalyǵy, balalarǵa arnalǵan stomatologııalyq emhana, sportzaldar, júıke aýrýlaryna ushyraǵan múgedek balalarǵa áleýmettik qyzmet kórsetý ortalyǵy tolyqtyra túsedi.
Buǵan deıingi júrgizilgen jýrnalıstik taldaýlar oblysta qolǵa alynǵan ári tolyqtaı iske asqan MJÁ jobalary negizinen áleýmettik sıpatqa ıe bolǵanyn kórsetedi.
О́ńirde áleýmet júgin arqalaǵan MJÁ jobalaryn bir-birimen ózara sabaqtas úsh baǵytqa bólip qarastyrýǵa bolady. Osy yńǵaımen tizbelesek, onyń alǵashqy kezegin densaýlyq saqtaý salasyna arnalǵan nysandar quraıtynyn kóremiz. Onyń alǵashqysy elimizde eshqandaı balamasy joq jedel járdem beketi qanatqaqty jobasy bolyp tabylady. Ony túrik ınvestorlary turǵyzǵan. 2016 jyldyń qańtar aıynda Aqtóbe oblysynyń ákimdigi men túrik kompanııasy ekijaqty kelisimge qol qoıyp, soǵan sáıkes ınvestor jobany júzege asyrý úshin 5 mıllıard 400 mıllıon teńge qarajat quıdy. Onyń qaıtarylý merzimi jeti jylǵa eseptelgen. Atalǵan aıryqsha nysan bıylǵy 2018 jyldyń naýryz aıynda paıdalanýǵa berildi.
Osy jobada qarastyrylǵan qosymsha qurylystar ekinshi kezeńge sáıkes odan ári jalǵasa bermek. Búgingi kúni bastalǵan qosalqy stansa – sonyń biri. Osy oraıda birinshi kezeń talaptaryna saı jedel járdem beketi avtoparkine ınvestorlar esebinen «Mersedes» markaly jańa reanomobıl, 16 sanıtarlyq sheteldik kólik jáne 2 dıagnostıkalyq avtomobıl satyp alynǵanyn aıtqan jón.
Qazirgi kúni balalarǵa arnalǵan tis emhanasynyń qurylysy qarqyndy júrgizilýde. Al qurylysy 3 mıllıard 800 mıllıon teńgeni quraıtyn «Dárý jaryǵy» oftolmologııalyq ortalyǵy ótken jyldyń jeltoqsan aıynda iske qosyldy. Munda ınvestordyń esebinen shyǵatyn shyǵyn memlekettik tapsyrys qarajatynyń esebinen qaıtarylmaq. MJÁ aýqymyndaǵy áleýmettik nysannyń biri – múmkindigi shekteýli balalarǵa arnalǵan qalpyna keltirý ortalyǵy. Ony ótken jyly jergilikti kásipker Nurıla Jarbolova ashty. Onyń jalgerlik aqysyn memleket tóleıdi.
Sonymen birge MJÁ aıasynda memleket ár balaǵa táýligine 5000 teńge tóleıdi. Al ortalyqtyń materıaldyq-tehnıkalyq bazasy men medısınalyq qural-jabdyqtaryna qatysty máseleler túgeldeı kásipkerdiń enshisinde. Taǵy bir aıta keterlik másele Nurıla Jarbolovaǵa jyl aıaǵynda ortalyq jumysyn júıeli túrde júrgizgeni úshin materıaldyq kótermeleý retinde 195 mıllıon teńge berilmek. Mundaǵy esep kem degende 100 balaǵa negizdelgen. Sáıkesinshe balalardyń sany budan azaıa túsken jaǵdaıda tıisinshe beriletin soma kólemi de azaıa túspek.
Keńestik kezeńde Aqtóbe qalasynda aýmaǵy atshaptyrymdaı jerde ornalasqan júndi alǵashqy óńdeý fabrıkasy bolǵan. «Aq rýno» JShS osy aýmaqty ǵımarattyń bazasynda tutastaı sport keshenin jasaqtady. Munda eki sport zaly jáne bes fýtbol alańy bar. Onyń bárine zama-
naýı jabyndyq materıaldar qoldanylǵan. Investor bul jobalarǵa 380 mıllıon teńge qarajat jumsaǵan. Qazirgi kúni keshendi jalǵa alýshy memlekettik mekeme Aqtóbe oblystyq sport jáne deneshynyqtyrý basqarmasy bolyp otyr.
Oblysta MJÁ aıasynda el ıgiligine berilgen nysandar jóninde áńgime qozǵaǵan kezde «Atameken» ulttyq kásipkerler palatasy óńirlik bólimshesi bastamashy bolǵan perspektıvalyq jobalar jóninde aıtpaı ketý esh múmkin emes. ıaǵnı bul baǵytta olar usynǵan saraptamalyq baılamdar MJÁ jobalaryn mazmun jaǵynan da, túr jaǵynan da baıyta tústi. Aıtalyq kásipkerlerdiń oblystyq palatasy usynǵan jobalardyń arasynda qazirgi kezde jeteýi keń aýqymdy taralymdy perspektıvalyq joba retinde belgilengen. Ári onyń bári Aqtóbe oblystyq ákimdigi tarapynan qoldaý tapqan. Bul jóninde gazet tilshisine «Atameken» óńirlik palatasy dırektorynyń ekonomıkalyq máseleler jónindegi orynbasary Janaıym Kelbatyrova aıtyp berdi.
Memleket-jekemenshik áriptestigi jobalarynyń basty máni úsh jaqqa da tıimdi tutqalardyń iske qosylýynda bir sózben aıtqanda, mundaı jaǵdaıda memleket pen jekemenshik ıeleri paıda tappasa, eshqandaı zııan shekpeıdi. Ortaq múdde degen osy da. Eń bastysy MJÁ negizinde turǵyndardyń áleýmettik turǵydaǵy qajettilikterin óteýdiń mol múmkindikteri bar. Bul MJÁ jobalarynyń úshinshi tıimdi jaǵy bolmaq. Osy oraıda Aqtóbe oblysy mysalyndaǵy aıtylǵan máseleler men derekter ózge óńirlerge de oń yqpalyn tıgizer bolsa, oıǵa alǵan maqsatymyzdyń oryndalǵany.
Temir QUSAIYN,
«Egemen Qazaqstan»
AQTО́BE
