Oıyn aldynda Belgııa favorıt sanaldy. Sebebi Anglııa quramasynyń bapkeri Garet Saýtgeıttiń qosalqy quramdaǵy jas fýtbolshylardy shyǵaratyny belgili boldy. Dennı Roýz, Rýben Loftýs-Chık, Fabıan Delf sekildi bolashaǵy bar fýtbolshylar birinshi mınýttan bastap alańǵa shyqty. Esesine, Djessı Lıngard, Markýs Reshford, Delle Allı sekildi myqtylar demalys aldy. Match bastalysymen Naser Shadlıdiń keremet pasyn Tomas Mene golǵa aınaldyrdy. Bul gol kezdesý taǵdyryna qatty áser etti. Ekinshi taımda jaǵdaıdy ózgertkisi kelgen bapker Anglııanyń oıynyn múlde bólek arnaǵa burdy. Alańǵa «Manchester Iýnaıtedtiń» eki oǵlany shyqty. Reshford pen Lıngard shabýylǵa dem berip, brıtanııalyqtar qarsylasty qyspaqqa ala bastady. Biraq, qarymta shabýylǵa ıek artyp kelgen Belgııa 82-mınýtta ekinshi goldy soǵyp, match taǵdyryn túbegeıli sheship tastady. Belgııa tuńǵysh márte qola júldeger atandy. Bas bapker Roberto Martınes oıynnan keıin «Bul qola medal Belgııanyń bizden keıin keletin jas fýtbolshylaryna baǵyndyratyn beles bolyp turýy tıis» dep aǵynan jaryldy. Qanshama jyldar boıy talantty urpaq tárbıelep kelgen «qyzyl soıqandar» esh nátıjege qoldary jetpeı, saly sýǵa ketip, unjyrǵasy tómen túsip qaıtatyn. Endi mine, uzaq kúttirgen medaldyń syńǵyry estilip, qorjyn bul joly bos qaıtpaıtyn boldy.
Álem chempıonattarynyń qola júldesi úshin talas eshqashan golsyz bolmaǵan. 0:0 degen esep eshqashan tirkelmegen eken. Bul jolǵy oıynda golsyz bolmady. Degenmen, oıynda 2-aq gol soǵyldy. 2 goldy azsynyp turǵanymyzdyń da óz jaıy bar. Búkil chempıonattardyń tarıhyndaǵy «kishi fınaldarda» ortasha eseppen 4 gol soǵylǵan eken. Al sońǵy 10 jubanysh kezdesýinde kem degende 3 goldan soǵylypty.
Sonymen qatar osy álem chempıonatynyń bir qyzyǵy – standartty jaǵdaılardan soǵylǵan goldardyń kóp bolýy. 28 penaltı belgilenip, onyń 21-i golǵa aınalǵan. Árbir oryndalǵan 30 buryshtamanyń biri golmen aıaqtalypty. Bıylǵy maýsymda Chempıondar lıgasynda bul kórsetkish sál nasharlaý edi. Ol týrnırde árbir 45 buryshtamada bir dop qaqpaǵa enip otyrǵan. Sonymen qatar Anglııa quramasy da bir rekordty qaıtalady. Jarysta 12 gol soqqan aǵylshyndar sonyń 9-yn standarttan uıymdastyrypty. Mundaı úlken kórsetkishti 1966 jyly Eısebıo bastaǵan Portýgalııa komandasy tirkegen.
21-ret uıymdastyrylǵan chempıonatta, sonymen birge taǵy bir tarıhı fakt ózgerdi. Keı chempıonattarda 4-5 komanda gol soqpaı qaıtatyn. Bul joly búkil 32 komandanyń da qanjyǵasy maılandy. Maılanǵany bylaı tursyn, 32 komanda kem degende 2 goldan soqty. Chempıonatqa birinshi ret kelgen Panamanyń ózi 2 ret esep ózgertti.
Ermuhamed MÁÝLEN,
«Egemen Qazaqstan»
