Káripbek Kúıikovpen birge aýstralııalyq Djefrı Lı jáne ulybrıtanııalyq Lında Ýolker syılyqqa laıyq dep tanylǵan. Taǵy eki syılyqty fransýz sýretshileriniń juby Dıde jáne Polet Angerge jáne olardyń aýstrııalyq áriptesi Pıter Veıshke buıyrǵan.
«Bul syılyq – búkil Qazaqstannyń eńbegi! Bul – elimizdiń, ATOM jobasynyń bastamashysy – Prezıdent Nursultan Nazarbaevtyń úlken jáne aýyr jumysynyń baǵasy. Respýblıkamyz óziniń jeke úlgisimen ıadrolyq atomdy taratpaý jáne qarýsyzdaný úshin qalaı kúresý qajettigin kórsetti, sondaı-aq ıadrolyq bolashaq úshin nemese oǵan qarsy sheshim qabyldaý máselesinde qobaljyǵan álemniń basqa memleketteri úshin tirek boldy», dedi K.Kúıikov.
ATOM jobasy – jahandyq ıadrolyq qarýsyzdaný men qoǵamdyq dıplomatııa salasynda Qazaqstan Respýblıkasynyń Prezıdenti N.Nazarbaevtyń mańyzdy bastamasy. Bul bastama BUU jarııalaǵan Halyqaralyq ıadrolyq synaqtarǵa qarsy áreketter kúni 2012 jylǵy 29 tamyzda Astanada «Iаdrolyq synaqtarǵa tyıym salýdan – ıadrolyq qarýdan azat álemge» halyqaralyq konferensııasynda jarııalanǵan bolatyn.
Qazirgi ýaqytta álemniń 100 elinen 300 000-nan asa adam Iаdrolyq synaqtarǵa jappaı tyıym salý týraly sharttyń (DVZIаI) óz kúshine jedel enýin qamtamasyz etý jóninde álem lıderlerine arnalǵan úndeý men ATOM jobasynyń onlaın-petısııasyna qol qoıǵan.
Baǵashar TURSYNBAIULY,
«Egemen Qazaqstan»
