«Búginde Eleke sazy aýmaǵyndaǵy 3 nysanda bir aı boıy qazba jumystary júrgizilip jatyr. Aıta ketý kerek, atqarylyp jatqan istiń aıtýly nátıjesi de bar. Tarıh ǵylymdarynyń doktory Zeınolla Samashevtiń málimdeýinshe, Tarbaǵataı taýlaryndaǵy Eleke sazyndaǵy 2 nysannan altyn zattar tabylǵan. “Bul – «Altyn adam» degen uǵymǵa sáıkes keletin eskertkishterdiń biri dep aıtýǵa bolady”, - deıdi ǵalym.
Qazirgi ýaqytta 3000-ǵa jýyq altyn buıym tabylǵan. Boljam boıynsha Saq dáýirindegi, ıaǵnı, b.z.d 8-7 ǵasyrǵa jatatyn bekzadalar men hanshaıymdarǵa tıesili zattar bolýy múmkin. Ásirese, áıel azamattarynyń altyn áshekeıleri, ár formadaǵy monshaqtar jáne kıimderine arnalǵan japsyrmalar men qapsyrmalar óte kóp. Sonymen qatar altynnan soǵylǵan at ábzelderi de bar.
“Sol dáýirdegi sheberlerdiń altyn buıymdardy jasaý tehnologııasy tańqaldyrady. Zergerler dıagonaly 1 mm bolatyn altyn monshaqtardy tesip, kıimderdi kómkergen. Bul degeniń sol zamandaǵy joǵary mádenıet pen ozyq tehnologııanyń qoldanysta bolǵandyǵyn, ıaǵnı olardyń ǵajaıyp dala órkenıetiniń ıesi ekendigin aıǵaqtaıdy”,-deıdi arheologtar» delingen oblys ákiminiń baspasóz qyzmeti taratqan aqparatta.
Atalǵan qazba jumystarynyń jetekshisi Zeınolla Samashev dál qazirgi ýaqytta jolda bolǵandyqtan baılanysqa shyǵa almaı otyrmyz. Aldaǵy birer saǵattar kóleminde Tarbaǵataıdan tabylǵan altyn buıymdar týraly táptishtep jazatyn bolamyz.
Azamat QASYM,
«Egemen Qazaqstan»
Shyǵys Qazaqstan oblysy,
Tarbaǵataı aýdany
Sýretterdi túsirgen Tileýbek Shaıahmet
