Eńbek erleri stýdenttermen kezdesti

Qazaqstannyń Eńbek Eri – Táýel­siz Qazaqstannyń sońǵy jyl­dary taǵaıyndalǵan joǵary ata­ǵy­nyń biri. Oǵan elimizde sanaýly adam ǵana ıe boldy. Sonyń ekeýi Qostanaı oblysynan. «Qarqyn» jaýapkershiligi shekteýli serik­tes­tigi­niń dırektory Saıran Bu­qanov ob­lystaǵy belgili kásipker, aýyl sha­rýa­shylyǵyn uıymdastyrýshy. Al «Zarechnyı» aýyl sharýa­shy­ly­ǵy ǵylymı-zertteý ınstıtýtynyń dı­rek­tory Valentın Dvýrechen­skıı­diń esimi elimizden syrt jerlerge de belgili. Ol aýyl sharýa­shy­ly­ǵy­na engizgen jańa tehno­lo­gııany ja­qyn jáne alys shet el dıqan­dary da bilip, qoldana basta­dy. Ylǵal saqtaý tehnologııa­sy­nyń barlyq elementterin tolyq paı­da­lanǵan «Zarechnyı» jaýapkershiligi shekteýli seriktestigi bıyl ár gektardan 37 sentnerden altyn dán jı­­nady. Taıaýda ǵana ótken aýyl sha­rýashylyǵy qyzmetkerleriniń res­pýb­lıkalyq forýmynda Elbasy Nur­sultan Nazarbaev Valentın Ivanovıchtiń keýdesine Altyn Juldyz taqty. Basqosýda ýnıversıtet qonaq­tary men stýdentter, oqytýshy­lar, ǵalymdar arasynda emen-jarqyn áńgime boldy. Naryq kelgen kezde bir sharýashylyqty shaı­qaltpaı, adamdaryn shashyratpaı bútin saq­tap qalyp, qazir qýatty agroóner­kásipke aınaldyryp otyrǵan Saıran Balkenuly jastarǵa izdený, eńbektený, bilim alý qajettigin aıt­ty. Al Valentın Ivanovıch ózi­niń zerttep, tájirıbeden ótkizip, óndiriske qosqan, qazir mol tabys kózine aınalyp otyrǵan ylǵal saq­taý tehnologııasyna kóbirek toq­tal­dy. Búginde Saıran Buqanovtyń sharýashylyǵyndaǵy mamandardyń barlyǵy derlik jastar. Olar Qos­tanaıdaǵy joǵary oqý ornyn bitirip, aýyl sharýashylyǵyna qajetti mamandyqtardy ıgergen. Kezdesýde Eńbek Eri aýylda áleýmettik jaǵ­daıdy durystaý, jastarǵa arnap baspana salý qajettigin de tilge tıek etti. Ol bıyldyń ózinde jas mamandarǵa arnap eki úı turǵyzdy. Stýdent jastar kezdesý kezinde ol basqaratyn «Qarqyn» sharýashy­ly­ǵyna tájirıbeden ótýge jáne jumysqa ornalasýǵa tilek bildirdi. Eńbek Erleri men stýdentter arasyndaǵy áńgimede aýyl sharýa­shylyǵynyń búgingi ózekti máse­le­leri de qozǵaldy. Jastar bıyl­ǵy mol astyqtyń baǵasy, aýyl­sharýa­shylyǵy bıznesi týraly surady. Saıran Buqanov qarqyn­dy damyp otyrǵan aýyl sharýa­shy­lyǵyna bolashaqta mamandar kóp qajet bolatynyn, sondyqtan bizdiń jastar bilimge óte den qoıýy kerektigin aıtyp ótti. Kezdesýde ýnıversıtet rektory As­qar Nametov bilim orda­sy aýyl sharýashylyǵyna arnap birneshe mamandyq túrlerin da­ıyn­da­ǵan­dyq­tan, óndiris pen oqý ornynyń tyǵyz baılanysta bolý kerektigine jáne sondaı jumystyń júrgizilip otyrǵanyna toqtaldy. Qos Eńbek Eri stýdentterdiń taǵy kóptegen suraqtaryna jaýap berdi. Názıra JÁRIMBETOVA. Qostanaı.