Redaksııaǵa kelip túsken málimet boıynsha, Kólik komıtetinde poıyzdardaǵy bıletsiz jolaýshylarmen kúresý jáne kóbeıip ketken jol júrý qujattaryn alyp-satý faktileri boıynsha operatıvti jınalys ótken. Jınalysqa tasymaldaýshy kompanııalardyń ókilderi qatysyp, olarǵa birqatar tapsyrmalar berilgen.
Kólik komıtetiniń habarlamasynda «2018 jyldyń basynan beri jolaýshylar poıyzynda kóliktik baqylaý organdary 681 bıletsiz jolaýshyny tasymaldaǵan derekti anyqtady. 2017 jyldyń sáıkes kezeńinde bul kórsetkish 830 bolǵan. Búginde jol júrý qujattaryn satý (bıletterdi), qaıtarý jáne qaıta rásimdeý úderisine taldaý júrgizildi. Bılet kassalarynyń, avtomattandyrylǵan júıe men poıyz brıgadalarynyń jumysyndaǵy negizgi sebepter men kemshilikter anyqtaldy. Taldaý zań buzýshylyqtar bıletterge tapsyrys toptap berilip, satylǵan kezde kóp jasalatynyn kórsetti. Budan bólek, jeke kassalardy qosqanda kún saıyn qaıtarylatyn bıletter kóleminiń kóp bolý faktisi anyqtalǵan (bir kassaǵa kúnine 30-dan astam bılet qaıtarylady). Búginde jeke kassalar sany 4500-den asady. Al «Jolaýshylar tasymaly» AQ-da 238 kassa bar.
Bul jaǵdaılarǵa qarsy kúres retinde barlyq tasymaldaýshylarǵa qoldanystaǵy avtomattandyrylǵan júıeni jetildirý tapsyryldy. Ol satý prosesine adamı faktordyń áserin tıgizbeıdi jáne oryndardy, bılet pen kassalyq operasııalardy basqarýǵa jáne baqylaýǵa múmkindik beredi», delingen.
Sonymen qatar bıletsiz jolaýshylardy tasymaldaý faktilerin anyqtaý jáne boldyrmaý, jol júrý qujattaryn qaıta satý jónindegi monıtorıngteý tobyn qurý sheshimi qabyldandy. Bul jumystar kóliktegi IID qyzmetkerlerimen birlese atqaryla bastaǵan. Oǵan qosa Kólik komıtetiniń habarlamasynda «Osyndaı quqyq buzýshylyqtardy boldyrmaý maqsatynda jumys toby aıasynda jáne jasalǵan taldaý negizinde jolaýshylardy tasymaldaýdy uıymdastyrýǵa baǵyttalǵan barlyq normatıvtik-quqyqtyq qujattardy ózektendirý boıynsha jumystar atqarylady», dep kórsetilgen. Sondaı-aq normatıvtik-quqyqtyq akt aıasynda bıletterdi brondaý arqyly satý, toptap beriletin tapsyrys satylymyn avtomattandyrý jáne ákimshilik jaýapkershilikti kúsheıtý máselelerin qarastyrý josparlanǵan.
Kólik komıtetiniń derekterine súıensek, qazirgi ýaqytta bıletsiz jolaýshylardy tasymaldaǵandarǵa salynatyn aıyppul mólsheri 5-7 AEK quraıdy.
Buǵan deıin jolaýshylardyń bılet tapshylyǵyna baılanysty muqtajdyqtary taldap kórsetilgen maqala jarııalanǵan kúnniń erteńine Memlekettik qyzmet isteri jáne sybaılas jemqorlyqqa qarsy is-qımyl agenttigi arnaıy monıtorıngtik toptarmen birge «qupııa satyp alýshy» aksııasyn bastaǵandyǵyn habarlaǵan edik. Eń bastysy, quzyrly oryndardyń birlesken, bir maqsattaǵy jumystary keshendi, júıeli túrde júrgizilip, jolaýshylar qozǵalysyna oń áserin tıgizedi dep senemiz.
Serik ÁBDIBEK,
«Egemen Qazaqstan»
