Vıse-mınıstrdiń aıtýynsha, barlyq zeınetaqy aýdarymdary azamattardyń tikeleı tapqan kirisinen tólenedi. Mysaly, kásiporyn qyzmetkeri úshin tapqan tabysy —onyń jalaqysy, jeke kásipker úshin ol kásipkerlik qyzmetten tikeleı túsken tabys, jeke notarıýstar úshin — bul olardyń kórsetken qyzmetinen túsetin tabys. Al óteletin sharttar negizinde (azamattyq-quqyqtyq sıpattaǵy sharttar) qandaı da bir jumys nemese qyzmet túrlerin oryndaıtyn azamattar úshin mindetti zeınetaqy jarnalary osy jumysty nemese qyzmetti oryndaý nátıjesi boıynsha túsken tabystan tólenedi (jeke múlkin satýdan emes).
«Eńbek jáne halyqty áleýmettik qorǵaý mınıstrligi árdaıym dıalog ornatýǵa ázir. Qoǵamda durys túsinik qalyptasqanyn qalaımyn. Áleýmettik jelilerde adamdar páter men kólik satýdan túsken aqshadan zeınetaqy jarnalary ustalyp qalady dep jatyr. Bul múldem jańsaq. Bul tabystardan zeınetaqy jarnalary ustalmaıdy. Zeınetaqy jarnalary eger sizge qyzmet kórsetý nemese jumysty oryndaý sharty boıynsha tabys túskende ǵana ustalyp qalady», — dep túsindirdi ol.
S. Jaqypovanyń aıtýynsha, kóptegen jumys berýshiler jáne jeke tulǵalar mindetti tólemder men zeınetaqy jarnalarynan jaltarý úshin azamattyq-quqyqtyq sıpattaǵy sharttar jasasady, biraq zeınetaqy jarnalaryn ádeıi tólemeıdi.
«Eshkim óziniń zeınetkerlik qamsyzdandyrylýy týraly oılamaıdy, qartaıǵan shaǵynda mundaı adamdar tek eń tómengi kúnkóris deńgeıin qamtamasyz etýdiń 50% shegindegi, bazalyq zeınetaqyny alatyn bolady. Bul shektelýi nárse emes qoı. Adamnyń basqa tabystary bolmasa da, memleket kómekke kelip, sizge túsetin tabysty eskere otyryp, ataýly áleýmettik kómekti kórsetetin bolady», — dedi ol.
S. Jaqypova osyǵan deıin aıtyp ketkendeı, Zańǵa bıylǵy jyldyń 14 shildesinde engizilgen túzetýlerge sáıkes, azamattyq-quqyqtyq sıpattaǵy sharttar boıynsha tabys alatyn jeke tulǵalar advokattar, jeke sot oryndaýshylary, jeke notarıýstar, kásibı medıatorlar, jeke kásipkerler tárizdi óz paıdasyna tólenýi tıis tabystan biryńǵaı jınaqtaýshy zeınetaqy qoryna mindetti zeınetaqy jarnalaryn tóleıdi.
Osyǵan baılanysty, QR Eńbek jáne halyqty áleýmettik qorǵaý mınıstrligi «Qazaqstan Respýblıkasy Úkimetiniń keıbir sheshimderine áleýmettik qamsyzdandyrý máseleleri boıynsha ózgerister engizý týraly» Qazaqstan Respýblıkasy Úkimeti Qaýlysynyń jobasy ázirlendi, onda sonymen qatar azamattyq-quqyqtyq sıpattaǵy sharttar boıynsha tabys alatyn jeke tulǵalardyń mindetti zeınetaqy jarnalarynyń belgili bir tártibi men tóleý merzimderin qarastyrady.
«Búgin biz tek azamattyq-quqyqtyq sıpattaǵy sharttardy zańnamalyq turǵydan sıpattadyq, óıtkeni jumystardyń oryndalýy men qyzmetterdiń kórsetilýi boıynsha olar birnesheý. Zań babyn júktemeleı bermeý úshin sáıkesinshe bul norma Úkimettiń qaýlysynda kórinis tapty. Úkimettiń quzyreti zańnyń ózinde jazylǵan. Atalǵan qaýlyda biz azamattyq-quqyqtyq sıpattaǵy sharttar boıynsha qyzmet kórsetetin jeke tulǵalar úshin tabys retinde jumystyń oryndalýy nemese qyzmettiń kórsetilýi bolyp tabylatynyn baıandaımyz. Reglamentke sáıkes ol 20 tamyzǵa deıin qabyldanady. Kelisý prosedýrasy qazir júrip jatyr, 7-10 tamyzda biz ony Úkimettiń qaraýyna jiberemiz», — dedi vıse-mınıstr.
Sońynda S. Jaqypova memlekettiń óziniń barlyq azamattaryna bazalyq, ortaq túrinde zeınetaqymen qamtamasyz etýge kepildik beretinin jáne ınflıasııa deńgeıinde zeınetaqy jarnalarynyń saqtalýyna memlekettik kepildik beretinin atap ótti.
«Inflıasııalyq kiris qandaı bolmasyn, eger ol ınflıasııadan tómen bolsa, bul aıyrmashylyqty memleket sizderge tóleıtin bolady. Bul saqtalý men kepildik barlyq úsh deńgeıde beriledi» — dedi ol.
