Ala bolsaq, aýyzdaǵy ketedi

Jańaózennen jetken sýyt habardy estigende kó­ńi­limizdi alań kernegenin jasyryp qaıteıik. О́mir jolyn jańa bastaǵan jas­tar­dyń álde­kim­niń arbaýy­na túsip, az­ǵyr­ǵanyna erip taǵdyr­laryn oıran etkeni ókinish­ti. Ondaı azǵyrý­shy­lardyń, tynyshtyǵy­myz­dyń shyny­syn shytynatqan búlikti uıymdastyrýshylardyń bar ekendigi de taıǵa tańba basqandaı aıqyn. Táýelsiz kún keshken 20 jyl­dyń ishinde elimizdiń úlken jetistikterge jetkendigi, óz tizginin qo­lyna alyp, derbes saıasat júr­gizip otyr­ǵandyǵy búginde bar­sha­ǵa aıan aqı­qat. Mundaı jetistikterge jetkenimizge súıinetin dos­tarymyz da jetkilikti, kóre almaı otyrǵan mysyq­tileýli qas­ta­ry­myz da joq emes. Ondaılar egemen eli­miz eshqashan aıaǵy­nan nyq tura al­masa, táýeldilikten aryl­­masa eken degen tileýde. Jańa­ózen­­de­gi jastar­dyń son­daı­lardyń otyna maı qu­ıyp, qol­jaý­ly­ǵy­na aınal­ǵa­ny­na janym kúıedi. Árıne, bul jerde eńbek daýy da oryn aldy. Biraq mundaı daý­dy sheshýdiń de zańdy joldary bar emes pe? Dúkender men ban­ko­mattardy tonap, avtokólikter men merekege tigilgen kıiz úılerdi ór­teý, sóıtip azamat­tar­dyń ty­nysh­tyǵyna qa­ter tóndirý eshqandaı qısynǵa syı­maıdy. Sonyń sal­dary­nan ba­la-shaǵasyn asyrap, beı­bit tirlik keship otyrǵan qanshama qara­paıym azamattar zardap shekti. Munyń aty – qylmys. Meniń oıymsha, eń aldymen sol qyl­mys­ty uıymdastyrýshylar qatań jazalanýy tıis. О́mir adamǵa bir-aq ret beriledi. Oılanbaı istegen isińnen opyq jep, taǵdyryńdy talqan etýiń de op-ońaı. Sondyqtan áldekim­der­diń sózine erip, ba­syńdy qaýip-qaterge tikken jón emes. Tyǵy­ryq­tan shyǵý­dyń, turmystyq kil­tı­pandy sheshý­diń de zań aıa­syn­daǵy myń san joly bar. Muny ómir jolyn jańa bas­taǵan jas­tar­dyń este usta­ǵandary abzal. Elimizdiń eń basty baılyǵy – tynyshtyq ekendigin eshýaqytta umytpaıyq. «Tórteý túgel bolsa, tóbedegi keledi, altaý ala bolsa, aýyzdaǵy ketedi» degende baba­larymyz yntymaq kerektigin aıt­qan bolar dep oılaımyn. Endeshe, osy yntymaǵymyzdan aıyr­masyn. Tursyn ÁBDÝÁLI, Almaty oblysynyń qurmetti azamaty.