Respýblıkalyq komıssııanyń quramyna memlekettik organdardyń, Ulttyq kásipkerlik palatasynyń, Joǵary oqý oryndary qaýymdastyǵynyń, qoǵamdyq birlestikterdiń, QR BǴM bilim jáne ǵylym máseleleri jáne bala quqyqtaryn qorǵaý jónindegi qoǵamdyq keńestiń, pedagogtar qaýymynyń ókilderi kiredi. Komıssııa otyrysynda Qazaqstan Respýblıkasynyń joǵary oqý oryndaryna qabyldaýǵa daıyndyq jumysy qorytyndylanady.
Jyl boıy mınıstrlik irikteý sapasyn arttyrý jáne stýdentter kontıngentin qalyptastyrý boıynsha birqatar júıeli jumystar atqaryldy. Memleket basshysy N. Nazarbaevtyń «Bes áleýmettik bastamasy» aıasynda bıyl memlekettik tapsyrystyń kólemi 20 myń grantqa artyryldy.
Sonyń 11 myńy tehnıkalyq baǵyttarǵa, sonyń ishinde aqparattyq tehnologııalar, robot tehnıkasy jáne nanotehnologııalar salalaryna, 5 myńy eńbek naryǵynda qajettilik baıqalyp otyrǵan basqa mamandyqtarǵa 3 myńy magıstrlerdi daıarlaýǵa, 1 myńy PhD doktorlaryn daıarlaýǵa baǵyttaldy. Sonymen, joǵary bilim granttarynyń sany 53 594-ke jetti.
Sonyń 5 944-i kúndizgi oqytýdyń 1-kýrsyna, 2 650-i JOO daıyndyq bólimderine qabyldaýǵa bólingen. Kórsetilgen basymdyqtardy eskere otyryp, 24 737 grantty tehnıkalyq jáne tehnologııalyq mamandyqtarǵa, 9 499 grantty pedagogıkalyq, 2 785 grantty aýyl sharýashylyǵy jáne veterınarııa, 2 700 grantty medısınalyq, 1 450 grantty gýmanıtarlyq, 100 grantty quqyq, 300 grantty óner, 1 780 grantty áleýmettik ǵylymdar, ekonomıka jáne bıznes, 3 246 grantty tabıǵı ǵylymdar, 2 330 grantty qyzmet kórsetý, 500 grantty áskerı is jáne qaýipsizdik mamandyqtaryna bólý kózdelip otyr.
Sonymen qatar memlekettik tapsyrysty ornalastyrýǵa ruqsat etilgen JOO tizimi de tolyǵa tústi. Bilim granttaryn taǵaıyndaý konkýrsyna 75 430 adam qatysyp jatyr. Sonyń 60 327-si qazaq tilinde bilim alǵysy keledi, 14 810-y orys tilinde oqýǵa nıet bildirgen, al aǵylshyn tilin 293 talapker qajetsinip otyr. «Máńgilik el jastary - ındýstrııaǵa!» jobasynyń aıasynda stýdentterdi oqytý kvotasy boıynsha konkýrsta 5 494 adam bilimin synap kóredi.
