Aqqaıyń aýdanynda jalǵasqan jumys saparynda halyq qalaýlylary Rýblevka aýylynda «Ivan Zenchenko» JShS-niń qarajatyna salynyp jatqan mal sharýashylyǵy kesheniniń qurylysynda boldy. 600 bas sıyrǵa arnalǵan sút fermasy kúzge salym paıdalanýǵa berilmek. Sútti baǵyttaǵy 596 mal ákelinipti.
«Daıyndyq agro» seriktestigi turǵyndardyń suranysy boıynsha Jansúgir batyrdyń kesenesin salýǵa qyzý kirisken. Qurylysqa qajetti materıaldar Aqtaý jaǵynan jetkizilipti. Sharýashylyq basshysy Birjan Sháımerdenov depýtattardy 800 malǵa arnalǵan keshen jobasymen tanystyrdy. Eldi mekende mádenıet úıi, feldsherdik-ambýlatorııalyq pýnkt, balabaqsha, taǵy basqa áleýmettik nysandar jumys istep tur. Mekteptiń kúrdeli jóndeýine 58 mıllıon teńge baǵyttalyp, jańa sport zaly iske qosylmaq.
Turǵyndarmen kezdesýde Erik Sultanov Soltústik óńirlerdi tabıǵı gazben qamtý jumys bastalyp ketkenin, 3-4 jylda Qyzyljar óńiri de jetkiziletinin habarlady.
Taıynsha aýdanynda ótken júzdesýlerde senatorlarǵa birqatar áleýmettik nysandar tanystyryldy. Vıshnevka mektebiniń paıdalanýǵa berilgenine 60 jyldan asypty. 80 oryndy bilim oshaǵynda 120 bala oqıdy. Onyń apatty jaǵdaıda turǵanyn kórgen depýtattar Parlamenttiń yqpal etýimen bólingen 40 mıllıard teńge mektepter men aýrýhanar salýǵa baǵyttalatynyn, kelesi jyly osy aýylda 150 oryndy eńseli ǵımarat boı túzeıtinin aıtty.
«Parlamentte 84 zań qabyldandy. Olardyń ishinde kásipkerlik, keden, salyq Kodeksteri sekildi mańyzdy qujattar bar. 2018-2020 jyldarǵa arnalǵan respýblıkalyq bıýdjetti bekitý barysynda oblys joldaryn qalpyna keltirý úshin qosymsha 5 mıllıard teńge alýǵa qol jetkizildi. Bul qarajat jergilikti joldardy jóndeýge jumsalatyn bolady», dedi halyq qalaýlylary.
«Taıynsha-Astyq» JShS-i iri agroqurylymdardyń biri sanalady. Qazaqstan naryǵynda 2005 jyldan beri jumys istep keledi. 800 adam jumyspen qamtylǵan. Eginshilikpen de, mal ósirýmen de aınalysady. Seriktestiktiń bas dırektory Anatolıı Rafalskıı Kanadadan oralǵanyn aıta kelip, alǵan áserlerimen, is-tájirıbelermen bólisti. Agroqurylymda suıyq mıneral tyńaıtqyshtar óndiretin zaýyt iske qosylypty. Endi ósimdikter men qoǵamdyq maldardyń ımmýnıtetin jaqsartatyn paıdaly mıkroorganızmder shyǵaratyn kásiporyn salý josparlanyp otyr.
Senatorlar mundaı ozyq jobalar men jańashyldyqtardy qoldap, atqyrylǵan jumystarǵa joǵary baǵa berdi.
О́mir ESQALI,
«Egemen Qazaqstan»
Soltústik Qazaqstan oblysy
