Semeıden Rınat Zaıytov, Pavlodardan Aspanbek Shuǵataev, Qaraǵandydan Dıdar Qamıev syndy ot aýyzdy, oraq tildi shaıyrlar, sondaı-aq alǵashqy qadamdarynan keńinen tanylyp qalǵan Arýna Kerimbek, Syrym Ádilbekov, Qanat Myrzahan da aldyńǵy lektiń qataryn tolyqtyrdy.
Sahnaǵa alǵashqy jup – Aıbek Qalıev pen qyzyljarlyq Qýanysh Ospanov kóterildi.
«Ákimderiń myń bolǵyr jigit eken,
Qasterlep, qadirleıtin aqyn atyn.
Aýdanynyń toıyna aıtys jasap,
El-jurtyn mol qyzyqqa batyratyn.
Oıpyrmaı, myna bizdiń Medet baýyr,
Ne degen júrek jutqan batyl ákim.
Aıbek pen Rınattaı aqyndardy,
Qoryqpaı aıtysyna shaqyratyn», – degen Aıbek jaqsyǵa súıinip, kemshilikke kúıinip, jyr tıegin aǵytty.Synaǵan jerin almas qylyshtaı kesip túsetin ol reti kelgende ótkir tilmen osyp túsip otyrdy.
«Shashyna qarap tursam, doda-doda,
Kólemi biraz jerge barypty ǵoı.
Dodalanǵan shashyńdy jınaımyn dep,
Basyńa bórik syımaı qalypty ǵoı...
Oıýly dep júrýshi ek buryn seni,
Burymdy Qýanysh dep ataımyz ba?» dep qarsylasynyń aýzyna qum quıdy.
Dıdar Qamıev pen Aspanbek Shuǵataevtyń sóz qaǵystyrýy zaldy dúr silkindirdi. Sharshy topqa túsip, top jaryp júrgen qos myqty aıtystyń kórigin qyzdyrdy. Petropavldyq Muhammed Qońqaev pen Rınat Zaıytov arasyndaǵy sóz saıysy ini men aǵanyń syılastyǵyna quryldy.
Aqtyq jarysqa tórt aqyn joldama alyp, olardyń arasynan qara úzip shyqqan Aspanbek Shuǵataev bas júlde retinde 600 myń teńgeni qanjyǵaǵa baılady. Birinshi oryndy Rınat Zaıytov /400 myń teńge/, ekinshi oryndy Qanat Myrzahan / 300 myń teńge/ jeńip aldy. Qalǵan aqyndarǵa 150 myń teńgeden syı-sııapat jasaldy. M. Jumabaev, Sáken Júnisov atyndaǵy júldeler de óz ıelerin tapty.
«Joldasbaı-Agro» seriktestiginiń basshysy Súıindik Joldaspaev 12 aqynǵa at mingizip, shapan japty.
О́mir ESQALI,
«Egemen Qazaqstan»
Soltústik Qazaqstan oblysy, Ýálıhanov aýdany
