Sol kúnnen bastap daıyndyq jumystaryna kirisken óner ujymy búginde elimizge oljaly oralyp, jambyldyqtardyń ǵana emes, búkil qazaqstandyqtardyń mereıin ósirdi.
Makedonııa memleketinde on jetinshi ret ótkizilip otyrǵan aıtýly óner dodasynda Jambyldan barǵan orys teatrynyń ujymy Edvard Radzınskııdiń «Neron jáne men» atty tragedııalyq fars janryndaǵy spektaklin sahnalady. Atalǵan spektakldiń qoıýshy rejısseri – Qýandyq Qasymov.
Adamzat tarıhynan belgili, Iýlıı-Klavdııler áýletiniń ókili bolyp sanalatyn Klavdıı Sezar Neron alǵashqy jyldary áıgili Býrr men fılosof Senekanyń yqpalynda bolyp, senatpen kelisip bılik etken ımperator. Alaıda ol keıingi kezde ózine qarsy shyqqan senat aqsúıekterin ǵana emes, qoǵamnyń ózge de ókilderin qýǵyn-súrginge ushyratyp, olardyń dúnıe-múlkin tárkileýge kóshedi. Neron qurbandyqtarynyń arasynda óz anasy, jaqyn týystarymen qatar, fılosof Seneka, aqyn Lýkan, jazýshy Petronıı sııaqty asa kórnekti tulǵalar bolady. Aqyry 68 jyly ózine qarsy kóterilis bastalyp, munda iri áskerbasylardyń qoldaýynan aıyrylǵan Neron Rımnen qashady jáne jolda ózin-ózi óltiredi. Sondyqtan da ol adamzat tarıhyndaǵy qasiretti tulǵa retinde sýretteledi. Al ımperator Neronnyń qaharyna ushyrap, aqyry ózin-ózi óltirýge májbúr bolǵan áıgili fılosof Seneka Lýsıı Anneı óz dáýiriniń shıelenisti máselelerin beınelegen shyǵarmalarymen bizdiń zamanymyzǵa deıin jetken ǵulama. Mine, «Neron jáne men» shyǵarmasynda osynaý adamzattyq másele kóteriledi.
Stobı qalashyǵynda ornalasqan amfıteatrda ótken festıval kezinde jergilikti jurtshylyq jambyldyq teatrdyń qoıylymyn jyly qabyldap, laıyqty qoshemet kórsetti. Nátıjesinde Jambyl oblystyq orys drama teatrynyń akteri, Seneka beınesin somdaýshy Beknazar Izbasarov «Úzdik er adam róli» nomınasııasy boıynsha joǵary jetistikke qol jetkizdi. Makedonııa memleketinde ótken aıtýly óner básekesine qatysatyn teatrlarǵa talaptyń joǵary bolatynyn eskersek, bul rette de jambyldyq ónerpazdardyń ónerin joǵary deńgeıde deýge bolady.
Hamıt Esaman,
«Egemen Qazaqstan»
Jambyl oblysy
