Bir mektepte 40 jyl qyzmet etken - Klımen Balabekuly

Sondaı ustazdardyń biri Klımen Balabekuly, sonaý KSRO kezinen bastap, keıin elimizdiń táýelsizdik alǵan jyl­darynda elordanyń bilim berý salasyna eleýli úlesin qos­qan, 40 jyl boıy bir mektepte sanaly ǵumyryn sarp etip, urpaqqa sapaly bilim berý salasynda aıanbaı eńbek etken úlken júrekti, izgi nıetti jan. Osyǵan baılanysty qolyma qalam alyp, osyndaı ulaǵatty ustazdyń bolǵany jaıly ósip kele jatqan urpaqqa bir-eki aýyz sóz jazýdy jón kórdim.

Otbasynda jalǵyz tárbıe­lenip, ata-anasyn qadirlegen jáne sońǵy sátterine deıin ba­lalyq paryzyn ótep, batalaryn alǵan bul azamat Almatydaǵy Abaı atyn­daǵy pedagogıka ıns­tı­týtyn hımııa, bıologııa­ jáne aýyl sharýashylyǵy negiz­deri mamandyǵy boıyn­sha bitirdi. Eńbek jolyn bu­rynǵy Selınograd, Aqmola, búgingi Astanadaǵy Ybyraı Altynsarın atyndaǵy №26 mektepte (burynǵy M.Ǵabdýl­lın atyndaǵy №62 qazaq orta mektebi) bastap, osy bilim ordasynda 40 jyl taban aýdarmaı eńbek etti.

1960-2000 jyldary mektepte qatardaǵy muǵalim, mektep dırektorynyń oqý-tár­bıe isi jónindegi orynbasary, keıin mekteptiń dırektory bolyp qyzmet atqardy. Ár oqýshyǵa erekshe kóńil bólip, bar kúshin tereń bilim berýge baǵyttady. Qazirgi kezde shákirtteri Par­lament depýtaty, joǵary oqý oryndarynyń ǵy­ly­mı qyzmetkerleri, aýyl sha­rýa­shylyǵy, medısına syndy qoǵamnyń san túrli salasynda eńbek etýde.

Zeınet demalysyna shyq­qan­nan keıin de attan túspedi. As­tananyń irgetasyn bekitýge óziniń az da bolsyn úlesin qosý­ǵa tyrysty. Ásirese jas­ býyn bolashaq sportshy­lar­dy tárbıeleýge at salys­ty. El sportyna eńbegi sińgen ta­laı dańqty sportshylardy tárbıelep shyǵarǵan Qa­jy­muqan Muńaıtpasov atyndaǵy sporttaǵy daryndy balalarǵa arnalǵan res­pýblıkalyq mektep-ınternatynda dırektordyń tárbıe isi jónindegi orynbasary qyzmetin atqardy.

Eldiń túkpir-túkpirinen jınalǵan qyzýqandy sportshy balalarǵa aqylyn aıtyp, ákesindeı tárbıesin berdi. Tárbıe isin qolǵa alyp, aqyl-parasatymen, adal­dyǵymen, ustazdyq óne­gesimen respýblıkalyq mek­tep-ınternattyń syıly aza­mattarynyń birine aınaldy. Klımen Balabekulynan tálim alǵan júzdegen sportshy bala Olımpıada oıyndaryna, Álem jáne Azııa chempıonattaryna qatysyp, el namysyn qorǵap, jańa Astanamyzdyń atyn qazirgi ýaqytqa deıin álemge tanytyp júr. Ustazdarynyń aıtqan aqyl-keńesi men bergen tárbıesi olardyń ómir jolyna paıdasyn tıgizgeni anyq. О́ıtkeni adam qandaı daryndy bolmasyn, bul ómirde kóp dúnıe alǵan tárbıege baılanysty.

О́mirlik serigi Sáýle Isa­qyzy da joldasymen birge bir mektepte qyryq jyl ustaz­dyq etti. Elge úlgi bolǵan erli-­za­ıyptylar tórt bala tárbıe­lep ósirdi. Balalary da  ata-anasynyń jolyn qýyp, ómirde óz joldaryn taba bildi. Tórt baladan 11 nemere, 6 shóbere súıip báıterekteı úlken áýletke aınaldy.

«Eldiń damýy onyń bilim berý júıesi arqyly baǵa­lanatyn bo­lady» degen Elba­­synyń dana sózi bar. Se­bebi­ ár memlekettiń eń bas­­ty baılyǵy adam bolsa, sol adamdy maman qylyp shy­ǵaratyn, shynyqtyratyn mektep. Sol sebepti de Klımen Ba­­labekulynyń Qazaqstannyń bolashaǵy úshin aıanbaı eńbek etip, el úmitin aqtaıtyn bilikti, bilimdi jas maman daıyndaý jolynda sińirgen eńbegi úshin alǵysymyz sheksiz. Osyndaı jandar elimizdiń bolashaǵyna jarqyn jol salyp, kelesi urpaqqa ónege bolatynyna ká­mil senemin.

Klımen Balabekulynyń beı­nesi taǵylymyn kórgen shá­kirt­teriniń, kisiligin kórgen árip­testeriniń, kómegin kórgen aǵaıyn-týysqany men dos-jaranynyń máńgi jadynda bolmaq.

Jeksenbaı DÚISEBAEV,

Parlament Májilisiniń depýtaty