2018 jylǵy 9 tamyzda Tájikstan astanasynda Qazaqstan Respýblıkasynyń Tájikstandaǵy Elshiliginiń járdemdesýmen jáne «Atameken» UKP Syrtqy saýda palatasy men Tájikstan Respýblıkasynyń Saýda-ónerkásip palatasynyń uıymdastyrýymen Qazaqstan-tájik iskerlik keńesiniń alǵashqy otyrysy jáne qazaqstandyq kásipkerlerdiń saýda mıssııasy ótti.
Qazaqstan tarapynan avtomobıl, qurylys, medısınalyq, taǵam jáne basqa da ónimderdi shyǵaratyn 20 otandyq óndirýshi qatysty. Ekijaqty kelissózderge qazaqstandyq ónimderdi satyp alýǵa qyzyǵýshylyq bildirgen 100-den astam tájik kompanııalary qatysty. Is-sharaǵa Tájikstan Respýblıkasynyń kólik, ekonomıkalyq damý jáne saýda, qarjy, densaýlyq saqtaý, ónerkásip jáne jańa tehnologııalar, energetıka mınıstrlikteriniń ókilderi keldi.
Saýda mıssııasynyń ashylý saltanatynda Qazaqstan Elshisi Nurlan Seıtimov mundaı is-sharalardyń Qazaqstan men Tájikstan arasyndaǵy ózara saýdanyń ósýine jáne ekonomıkalyq yntymaqtastyqty nyǵaıtýǵa járdemdesetinin aıryqsha atap ótti. Sondaı-aq, Elshi eki el Memleket basshylarynyń saýda-ekonomıkalyq baılanystardy ulǵaıtýǵa jáne tereńdetýge barynsha jaǵdaı jasaǵanyn, eki el isker toptarynyń arasynda ózara tıimdi áriptestik qarym-qatynastar jasaýǵa berik irgetas qalaǵanyn atap kórsetti.
Iskerlik keńes otyrysynyń sheńberinde «SaryarkaAvtoProm» JShS men «Azııa Grýpp Tadjıkıstan Holdıngi» JAQ arasynda «JAC» markaly 50 avtomobıldi jetkizý jáne «JAC» avtomobılderine Tájikstan aýmaǵynda dıllerlik ókilettikter berý týraly eki kelisimge qol qoıyldy.
