Esterińizge sala keteıik, Azıada baǵdarlamasyndaǵy dzıýdoshylar saıysy 29 tamyz ben 1 qyrkúıek aralyǵynda ótedi dep josparlanǵan. Áıelder arasyndaǵy básekede Qazaqstannyń týy astynda Otgonseseg Galbadrah (48 kılo), Kámshat Qarasaıqyzy (52 kılo), Sevara Nyshanbaeva (57 kılo), Iolanta Berdibekova (63 kılo), Zere Bektasqyzy (70 kılo), Zarına Raıfova (78 kılo) jáne Gúljan Isanova (+78 kılo) óner kórsetedi. Bizdiń dzıýdoshylar Jakartaǵa 25 tamyzda attanady.
Bas bapkerdiń paıymdaýynsha, altyn medaldi Otgonseseg Galbadrah ıelenýge tıis. Iá, asa jeńil salmaqta beldesetin áıgili balýan otandyq dzıýdoshylar arasynda kóshbasshy ekeni daýsyz. Osydan úsh jyl buryn Qazaqstannyń azamattyǵyn alǵan mońǵol qyzy sol kezden beri tolaǵaı tabysymen óz jankúıerlerin qýantýda. 2015-2018 jyldar aralyǵynda ol jıyrmadan asa jaýapty jarystarda júlde aldy. Solardyń arasynda 2016 jylǵy Rıo Olımpıadasy men 2017 jylǵy Býdapeshtegi álem chempıonatynyń qola medaldary bar. Sonymen qatar, Galbadrah Azııa birinshiliginde altyn men kúmis jáne Dúnıejúzilik Ýnıversıadada qola medaldi enshiledi. Qazirgi kezde ol álemdik reıtıngte 7 oryndy ıemdenýde.
Desek te Otgonsesegke Azııa oıyndaryn utý ońaı bolady dep oılasańyzdar qatelesesizder. Sebebi, 48 kılo salmaqtyń álemdik reıtınginde sary qurlyqtyń úsh birdeı ókili qazaqstandyq balýannan joǵary tur. Olar – mońǵolııalyq Uranseseg Muńhbat pen Japonııanyń qos juldyzy – Fýna Tonakı men Amı Kondo. Alǵashqy ekeýi úzdikter tizimindegi birinshi jáne ekinshi oryndardy ózara bólisse, úshinshisi 7 satyǵa jaıǵasty. Jáne de olardyń jeńip alǵan júldeleri de jeterlik. Tarqatyp aıtsaq, Uranseseg Muńhbat – 2013 jylǵy álem chempıony jáne 2014 jylǵy álemniń vıse-chempıony. 2014 jylǵy Azııa oıyndarynyń jeńimpazy. Qurlyq birinshiliginde úsh ret (2009 jyl – qola, 2012 jyl – altyn, 2013 jyl – qola) jáne Dúnıejúzilik Ýnıversıadada eki ret (2009 jyl – kúmis, 2015 jyl – qola) jeńis tuǵyryna kóterildi.
Japonııanyń qos arýy jaıynda aıtar bolsaq, Amı Kondo Rıo Olımpıadasynyń qola júldegeri. Álem chempıonatynda ol eki márte jeńis tuǵyrynan qol bulǵady. 2014 jyly Chelıabide aldyna jan salmasa, 2015 jyly Astanada úshinshi orynǵa taban tiredi. Al Fýna Tonakı byltyrǵy jylǵy álem chempıony.
Qazaqstan quramasynyń bas bapkeriniń osy jarysta josparlap otyrǵan qos qolasynyń birin asa aýyr salmaqtaǵy Gúljan Isanova alýǵa tıis. 34 jastaǵy qazaq balýany buǵan deıin 2006 jáne 2010 jyldary alaýy tutanǵan Azııa oıyndarynda úshinshi oryndardy oljalaǵan bolatyn. Odan bólek, Azııa chempıonattarynda 1 altyn, 2 kúmis jáne 5 qola medaldi qorjynǵa saldy. Qazirgi kezde Gúljan álemdik reıtıngtiń +78 kılo salmaq dárejesinde 26 orynda tur.
Al qalǵan qyzdarymyz dúnıejúzilik reıtıngte myna satylarǵa jaıǵasty: Kámshat Qarasaıqyzy – 179 oryn, Sevara Nyshanbaeva – 21 oryn, Iolanta Berdibekova – 170 oryn, Zere Bektasqyzy – 48 oryn jáne Zarına Raıfova – 33 oryn.
Ǵalym SÚLEIMEN,
«Egemen Qazaqstan»
