Memleket basshysy jurtshylyq aldynda sóılegen sózinde barsha qazaqstandyqty Qurban aıt merekesimen quttyqtap, bul meıramnyń beıbitshilik pen adal nıetke negizdelgen sımvoldyq mániniń zor ekenin jáne ıslamnyń myzǵymas rýhanı qundylyqtaryn aıqyndaıtynyn, sondaı-aq meıirimdilik pen izgiliktiń, jaqsylyqtyń jarshysy bolyp sanalatynyn atap ótti.
«Búkil musylmandar, halqymyz namazyn oqyp, paryzyn oryndaý maqsatynda meniń Jarlyǵymmen bul kún meıram dep jarııalanǵan. Halqymyz osy kúndi erekshe atap ótip, namaz oqyp, qulshylyq jasap, Alladan tilek tilegen. Bul ‒ Allanyń kórsetken joly, Paıǵambardyń izi. Qazaqstannyń barsha musylman qaýymyn osy merekemen quttyqtaımyn! Sizderdiń barlyq duǵa-tilekterińizdi Alla qabyl etsin!» dedi N.Nazarbaev.
Qazaqstan Prezıdenti Qurban aıttyń mán-mańyzy tek namaz oqýmen jáne qurbandyq shalýmen shektelmeıtinin aıtty, sondaı-aq jaǵdaıy joq otbasylarǵa, jetimderge, qarttar men barlyq muqtaj jandarǵa qaıyrymdylyq tanytyp, kómek kórsetýge shaqyrdy.
«Bul mereke eldiń birligi men bolashaǵyn nyǵaıtyp, ıman, qanaǵat, qaıyrymdylyq maǵynasyn bildiredi. Osy kúnderi aǵaıyn-týysqan qaýyshyp, bir-biriniń úıinde dám tatyp, kemtarlarǵa kómektesip, jaqsylyq jasaıdy. Qazirgi tańda elimizdiń azamattary «Rýhanı jańǵyrý» baǵdarlamasymen óziniń týǵan jerine, aýylyna jaqsylyq jasap, aýrýhana, balabaqsha, mektep salyp berip jatyr. Mundaı qaıyrymdylyq ta saýapty bolady dep esepteımiz. Osyndaı ıgi isterdi jalǵastyra berý kerek», dedi Elbasy.
Memleket basshysy búginde Qazaqstanda dinderdiń órkendeýi úshin jáne olardyń konfessııalyq ustanymdaryna qaramastan, dinı ǵuryptarynyń oryndalýyna barlyq jaǵdaı jasalyp otyrǵanyn aıtty.
«Jýyrda Astanada jahandyq jáne konfessııaaralyq dıalog pen qarym-qatynastardyń odan ári damýyna serpin beretin Álemdik jáne dástúrli dinder kóshbasshylarynyń VI sezi ótedi», dedi N.Nazarbaev.
Qazaqstan Prezıdenti Qurban aıttyń tereń mán-mazmuny qonaqjaılylyqty, dostyq pen birlikti qasterleıtin halqymyzdyń rýhanı qundylyqtarymen jáne mádenıetimen úndesetinin atap ótti.
«Barshańyzǵa zor densaýlyq, árbir otbasyna baq-bereke tileımin! Qazaqstanymyz órkendep, elimizde árdaıym dostyq, tynyshtyq pen turaqtylyq saltanat qura bersin!» dedi Memleket basshysy.
Sońynda Nursultan Nazarbaev otandastarymyzdy Qurban aıtpen taǵy da quttyqtap, Qazaqstan halqyna baq-bereke tiledi.
Abaı ASANKELDIULY,
«Egemen Qazaqstan»
