Bul sportshylardyń ekeýiniń de esimderi jankúıerlerge jaqsy tanys. Osy kúnge deıin 30 jastaǵy Jalǵas 14 jekpe-jek ótkizip, 11 ret jeńis toıyn toılady.
7 kezdesýdi merziminen buryn aıaqtady. 27 jastaǵy Tagır 6 ret aıqas alańyna shyǵyp, barlyǵynda basymdyq tanytty. 4 kezdesýdi merziminen buryn aıaqtady. Qazirgi kezde ol erejesiz jekpe-jek áleminde dańqy dúrkirep turǵan Habıb Nurmaǵambetovtyń ákesi ári bapkeri Abdýlmanap Nurmaǵambetovtyń qol astynda jattyǵýda.
Taǵy bir aıta keterligi, Reseı sportshysy buǵan deıin Qazaqstannyń eki birdeı órenine tize búktirgen. 2016 jyldyń kúzinde Asý Almabaevtan aılasyn asyrsa, byltyrǵy jyldyń qańtar aıyndaǵy Shyńǵys Qaıranovty upaı sanymen qapy qaldyrdy. Qandastarymyzdyń jibergen sol esesin osy joly Jalǵas Jumaǵulov qaıtarady degen oıdamyz. Keshtiń basty jekpe-jeginde jeńiske jetken sańlaqqa Fight Nights Global nuqasynyń jeńil salmaqtaǵy chempıondyq belbeýi tabys etiledi.
Astanadaǵy jarys delebeni qozdyryp, asa qyzyqty ótetini esh kúmán týǵyzbaıdy. Sebebi, qos sportshy da qazir babynda. Ekeýi de jeńiske jetý jolynda esh aıanyp qalmaımyz dep julqynyp tur. Jeńiske jetken jigit Fight Nights Global uıymnyń chempıondyq belbeýin ıelenedi. Bul da qosymsha stımýl. Sonymen qatar, sol keshte ótetin ózge de básekeler kópshiliktiń qyzyǵýshylyǵyn týdyratyny sózsiz. О́ıtkeni, jarys jolyna shyǵatyndardyń deni túrli dúbirli dodalarda ózderiniń myqtylyǵyn moıyndatyn júrgen jalyndy jigitter, – deıdi osy týrnırdi uıymdastyrýshylardyń biri, «Alash Praıd» klýbynyń prezıdenti Danııar Qasqaraýov.
«Esildegi aıqas» týrnırinde Jalǵas Jumaǵulov pen Tagır Ulanbekovtyń aıqasynan bólek, tómende esimderi atalǵan sportshylar arasyndaǵy kezdesýlerdi tamashalaı alasyzdar:
Sultan Joldasbek (Qazaqstan) – Batyrjon Tursynov (О́zbekstan)
Danııar Qoıshybek (Qazaqstan) – Avlıe Namıdov (О́zbekstan)
Mırat Bekishev (Qazaqstan) – Abdýrasýl Quldashev (О́zbekstan)
Nıkolaı Samýsev (Qazaqstan) – Ilsýr Hamzın (Reseı)
Farhad Sársenbekov (Qazaqstan) – Vladımır Ishmenev (Reseı)
Muhammed Meıramov (Qazaqstan) – Amındjon Teshaboev (Tájikstan)
Dáýren Ermekov (Qazaqstan) – Nursultan Rýzıboev (О́zbekstan)
Ákimjan Jasulan (Qazaqstan) – Radjabalı Faızıdın (Tájikstan)
Juman Jumabekov (Qazaqstan) – Muhammed Emınov (Reseı)
Sábıt Júsipov (Qazaqstan) – Farıdjýlla Qurbanov (Reseı)
Baqtııar Nesipbek (Qazaqstan) – Maqsatdjon Iýsýpov (О́zbekstan)
Asý Almabaev (Qazaqstan) – Djovhar Doshýev (Reseı).
Al osy jarysta óner kórsetetin jalǵyz qyzymyz Zámzágúl Faızollanovanyń kimmen aıqasatyny ázirge belgisiz. Qalaı bolǵan jaǵdaıda da «Bopaı» degen laqap atpen tanymal sportshymyz óz jankúıerlerin jerge qaratpaıtynyna senimdimiz.
Ǵalym SÚLEIMEN,
«Egemen Qazaqstan»
