Aýstrııa prezıdenti Aleksandr Van der Bellen, BUU-nyń segizinshi Bas hatshysy Pan Gı Mýn, Aýstrııanyń burynǵy prezıdenti Haıns Fısher, Serbııanyń premer-mınıstri Aleksandr Výchıch jáne taǵy basqa da saıasat sańlaqtaryn bir arnada toǵystyrǵan basqosýda ǵalamdyq tektonıkalyq saıası-ekonomıkalyq ózgerister konteksindegi eleýli máseleler saralandy.
О́zekti forýmǵa elimizdiń jetekshi oqý oryndarynyń biri – ál-Farabı atyndaǵy QazUÝ jáne taıaýda ýnıversıtet janynda qurylǵan Pan Gı Mýn atyndaǵy turaqty damý ınstıtýty BUU-nyń jahandyq azamattyq jáne turaqty damý baǵytyndaǵy bastamalaryn júzege asyrý boıynsha yntymaqtastyqtyń perspektıvalaryn talqylaý maqsatynda shaqyrylǵan bolatyn.
Eske salsaq, QazUÝ «BUU-nyń «Akademııalyq yqpal» jahandyq habyn 2014 jyldan beri basqaryp keledi. Az ýaqyt ishindegi nátıje de jaman emes. Baǵdarlamanyń mańyzdy qaǵıdalaryn iske asyrýda halyqaralyq deńgeıde kóshbasshy bolǵan ýnıversıtetti álemniń ozyq elderi kóshbasshy retinde joǵary baǵalap otyr.
QazUÝ rektory, akademık Ǵalym Mutanovtyń «Ýnıversıtet 4.0 – joǵary bilim berýdegi jańa kezeń» atty baıandamasy forýmǵa qatysýshylardyń erekshe qyzyǵýshylyǵyn týdyrdy. Atalǵan bastama buǵan deıin BUU-nyń Nıý-Iorktegi shtab-páterinde mamyr aıynda ótkizilgen konferensııa barysynda alǵash ret usynylǵan edi. Osy qyzmettegi aıqyn baǵyt memlekettik baǵdarlama – «Bolashaqqa baǵdar: qoǵamdyq sanany jańǵyrtý» ıdeıasynan bastaý alady.
Jańa ýnıversıtet modeliniń basty maqsaty – óskeleń urpaqty boıynda álemdik joǵary rýhanı-adamgershilik qasıetteri men belsendi azamattyq ustanymy bar izgi azamat retinde qalyptastyrý. Forýmǵa qatysýshylar atap ótkendeı, «Ýnıversıtet 4.0» jańa modeli jahandaný jaǵdaıynda, sondaı-aq jańa tehnologııalardyń qarqyndy damýy kezeńinde álem úshin mańyzdy.
Qazaqstandyq joǵary oqý ornynyń forýmǵa qatysýynyń basty nátıjesi Ǵalamdyq azamattyq ortalyǵy (Aýstrııa), Turaqty damý ınstıtýty (Ońtústik Koreıa) jáne ál-Farabı atyndaǵy QazUÝ arasynda Strategııalyq seriktestik týraly kelisimge qol qoıý boldy. Qujatty Aýstrııanyń eks-prezıdenti Haıns Fısher, BUU-nyń segizinshi Bas hatshysy Pan Gı Mýn jáne QazUÝ rektory Ǵalym Mutanov (Qazaqstan) qol qoıyp bekitti. Kelisim adamzattyń jahandyq máseleleri men qazirgi zamannyń syn-tegeýrinderin sheshýde taraptardyń kúsh-jigerin biriktirýge múmkindik bermek.
Forýmǵa qatysqan aıtýly ǵalymdar men álemdik deńgeıdegi sarapshylar elimizdiń ǵalamdyq yntymaqtastyqqa qosyp kele jatqan úlesin erekshe baǵalap, alǵys bildirdi.
Arman OKTIаBR,
«Egemen Qazaqstan»
ALMATY
