Oqýshylardyń alańsyz bilim alýy úshin memleket tarapynan aıtarlyqtaı qoldaý kórsetilip keledi. Birqatar óńir jańa oqý jylyn jańa mekteptermen bastaıdy. Elbasynyń jańa oqý oryndaryn qurý men úsh aýysymdy mektep máselesin sheshý boıynsha júktegen mindetin oryndaý aıasynda mektep qurylystary qyzý júrgizilýde.
Bilim jáne ǵylym mınıstrligi baspasóz qyzmetiniń málimdeýinshe, bıyl respýblıkalyq bıýdjet esebinen 53 mlrd teńgege 110 mektep salynǵan. Buǵan deıin habarlaǵanymyzdaı, bıyl 72 mektep paıdalanylýǵa beriledi. Onyń ishinde 49 mektep 1 qyrkúıek kúni esigin ashsa, jyl sońyna deıin 23 mektep paıdalanylýǵa beriledi dep josparlanǵan.
72 mekteptiń úsheýi – Aqmola oblysynda, al Aqtóbe óńirinde – 9, Almaty oblysynda – 6, Shyǵys Qazaqstan oblysynda – 1, Jambyl oblysynda – 4, Batys Qazaqstan oblysynda – 3, Qaraǵandyda – 3, Qyzylordada – 5, Mańǵystaýda – 8, Túrkistanda – 20, Almaty qalasynda – 7, Astana qalasynda 3 bilim oshaǵy salynǵan.
2015-2017 jyldary «Nurly jol» memlekettik baǵdarlamasy aıasynda mektepterdiń qurylysyna 135 mlrd teńge bólingenin aıta ketkenimiz jón. Bul qarajatqa 108 mektep boı kótergen. Jalpy, 3 jyldyń ishinde ulttyq qor, respýblıkalyq jáne jergilikti bıýdjet esebinen 347 jańa mektep salynǵan. Iаǵnı 235 jańa bilim oshaǵyn salý josparlanǵanymen, jospar 147 prosentke asyra oryndaldy.
Mınıstrlik ókilderiniń aıtýynsha, bıyl jekemenshik mektepterdiń qurylysyn yntalandyrý boıynsha sharalar nátıjeli júrgizilýde. Atap aıtsaq, «Bilim týraly» Zańǵa sáıkes, memlekettik bilim berý tapsyrysyn jekemenshik mektepterge ornalastyrýǵa múmkindik beretin tolyqtyrýlar engizildi.
Jańa oqý jylynyń jaǵymdy jańalyqtarynyń biri sıfrlandyrý, IT tehnologııalar men robototehnıkany damytý úshin qosymsha bilim berý múmkindikteriniń keń arnaǵa túskendigi. О́ńirlerdegi jergilikti atqarýshy organdar robototehnıka, baǵdarlamalaý, 3D-prıntıng synyptaryn ashýda ilkimdi istermen qýantýda. Qazirgi ýaqytta 1 500 mektepte sıfrlanǵan synyptar jumys isteıdi. Aldaǵy ýaqytta barlyq óńirde IT-lıseılerin ashý josparlanǵan. Odan bólek sıfrly bilim berý resýrstary belsendi qoldanylyp, mınıstrlik usynysymen jańa oqý jylynan bastap ár balaǵa jeke logın beriledi. Endi sıfrly resýrstar úıde de, mektepte de bárine qoljetimdi bolady.
Mıras ASAN,
«Egemen Qazaqstan»
