Bıyl Aqtóbe aımaǵynda 26 mekteptiń qurylysy qyzý ári toqtaýsyz júrgizilýde. Atalǵan bilim berý nysandary tolyq iske qosylǵan kezde 10 myńnan astam oqýshynyń jańa bilim berý standarttaryna saı zamanaýı qural-jabdyqtarmen jabdyqtalǵan sáýletti orynda bilim alýyna múmkindik týmaq. Sonymen birge óńirde mektep ǵımarattaryna jasalatyn kúrdeli jóndeý jumystary tyń serpin aldy. Jetpiske tarta bilim nysandary jańa oqý jylyna deıin qaıtadan jańǵyrtyldy. Jumsalǵan qarajat mólsheri – 2 mıllıard teńgege jýyq.
Jalpy bilim berý mekemelerin jańa oqý jylyna ázirleý tek biryńǵaı jańa mektep ǵımarattaryn paıdalanýǵa berýmen nemese oǵan kúrdeli jóndeýler júrgizýmen shektelmeıdi. Bul keshendi ári úzdiksiz úderis. Osy oraıda 2018-2019 oqý jylynda mektep oqýshylary paıdalanýǵa qajetti oqýlyqtardy jetkizý isi de belgilengen kestege saı retin tapty. Ári mektepterdiń materıaldyq-tehnıkalyq bazasyn odan ári jańǵyrtý baǵytynda qolda bar múmkindikter men áleýetter qarastyryldy. Buǵan qosa oblystaǵy bilim berý mekemelerin sporttyq qural-jabdyqtarmen qamtý jóninde qajetti sheshimder qolaıyn tapqan. Bul jóninde oblystyq bilim basqarmasynyń basshysy Lázzat Orazbaeva aıtyp berdi.
«Oblys aýmaǵy úlken. Salystyrmaly túrde aıtqanda, óńir aýmaǵyna Eýropanyń 2-3 shaǵyn memleketi syıyp ketedi. Mundaı jaǵdaıda shalǵaı aýyldardaǵy bilim berý nysandary men mektepke deıingi tárbıe mekemeleriniń jaı-kúıin jan-jaqty oılastyrmaı otyra almaımyz. Qazir kún salqyndaı bastady. Osyndaı qarbalas shaqta alystaǵy aýyl mektepterin jylytý úshin suıyq jáne qatty otynmen tolyq qamtý máselesi de udaıy nazarda. Bul jaýapty is qazanǵa deıin aıaqtalady», dedi ol.
Temir QUSAIYN,
«Egemen Qazaqstan»
AQTО́BE
