Olympic.kz búgingi jarys kúnin qorytyndylaı kele, mańyzdy sporttyq oqıǵalardy nazarlaryńyzǵa usynady.
Baıdarka men kanoede eskek esýshiler jankúıerlerdi taǵy bir qýantyp tastady. Inna Klınova Azıada chempıony atansa, Sergeı Tokarnıskıı kúmis júldege qol sozdy.
Eki adamdyq kanoede Tımýr Haıdarov pen Mereı Medetov úzdik úshtikke endi.
Sondaı-aq, baıdarka esýden Inna Klınova, Zoıa Ananchenko, Irına Podoınıkova jáne Vıktorııa Kopeva tórttigi ekinshi orynnan kórindi.
Jankúıerler kútpegen júldeni trıatlonshy Aıan Beısenbaev syılady. Bizdiń sportshy japondyq atletke qana ese jiberip, kúmis medal ıegeri atandy.
Dzıýdodan aralas komandalyq synda Qazaqstan komandasy fınalǵa deıin súrinbeı, aqtyq synda japondardan jeńildi. Bul baǵdarlama Azııa oıyndaryna alǵash ret enip otyr. Endeshe, bastama jaman emes.
О́kinishke qaraı, qazaq boksshylarynyń jeńiske jetýine búgin kedergiler kóp boldy. Fınalda joǵary deńgeıde judyryqtasqan Aslanbek Shymbergenov pen Ábilhan Amanqul tóreshilerdiń sheshimi boınsha kúmiske laıyq dep tanyldy.
Biz úshin eki boksshynyń mártebesi chempıonnan kem emes.
Voleıboldan áıelder komandasy sońǵy matchta Vetnamdy 3:1 esebimen jeńip, Azıadany besinshi orynmen aıaqtady. Al qazirgi bessaıystan Pavel Ilıashenko besinshi, Vladıslav Sýharev 12-shi oryn aldy.
Samboshylar el qorjynyna taǵy bir altyn men qola júlde saldy. 68 kelige deıingi salmaqta Dildash Kúrishbaeva Azıada chempıony atansa, 90 kelidegi Álibek Zekenov qolany qanaǵat tutty.
Qazaqstandyq vaterpolshylardyń jeńiske degen jigeri barsha jankúıerdi qýantty. Fınaldyq synda Japonııadan 3:7 esebimen utylyp tursa, bizdiń komanda jigitteri erik-jigerin jınap, qarsylastan jeńisti julyp aldy. Esep – 8:7. Altyn bizdiń qorjynda!
Bıylǵy Azııa oıyndaryndaǵy eń sońǵy júldeni regbıden Qazaqstan áıelder komandasy jeńip aldy. Olar qola medal úshin ótken kezdesýde Taılandtan basym tústi.
Azııa oıyndarynyń qorytyndysy boıynsha, Qazaqstan 76 medal jeńip aldy. 15 altyn, 17 kúmis jáne 44 qola. Jalpy komandalyq esepte biz 9-shy oryndamyz.
Búgin trıatlonnan komandalyq syn ótedi, alaıda, Qazaqstan quramasy atalǵan básekege qatyspaıdy.
Al búgingi esep boıynsha kósh basyndaǵy Qytaıdy 289 medal bar (132 altyn). Ekinshi oryndaǵy Japonııada 204 medal (74 altyn). Úzdik úshtikti tuıyqtaǵan Ońtústik Koreıa 176 medal jeńip aldy (49 altyn).
FOTO: Danııar Maılybaev, Salı Sabırov. Qazaqstan UOK baspasóz qyzmeti.
