«Búgin Qazaqstan Túrki keńesiniń tóraǵalyǵyn aıaqtap, bul mindetti qyrǵyz eline tabystady. Qazaqstannyń tóraǵalyǵy kezinde Túrki memleketteriniń ıntegrasııasy óz jalǵasyn tapty. Atap aıtqanda, Astanada ótken sammıtte túrkitildes memleketter ıntegrasııasynyń tujyrymdamasyn ázirleý jumystary berilgen bolatyn. Búgin sol qujat qabyldaýǵa daıyn. Munda ıntegrasııanyń maqsattary men qaǵıdattary, damý kezeńderi men iske asyrý joldary aıqyndaldy. Sondaı-aq básekege qabiletti ulttyq ekonomıka qurýǵa, mádenı-gýmanıtarlyq baılanystardyń tereńdetýge yqylas tanyttyq. Búgin aqparattyq tehnologııalar, energetıka, kólik-tranzıt, qarjy salalaryndaǵy yntymaqtastyqty keńeıtýge erekshe nazar aýdaryldy. Qazaqstannyń tóraǵalyǵy aıasynda ǵylymı-aǵartýshylyq jumystarǵa da aıryqsha kóńil bólindi».
«Máselen, bizdiń tapsyrmalarymyzǵa sáıkes, ortaq túrki tarıhy oqýlyǵy ázirlenip, elderimizdiń mektep baǵdarlamasyna engizile bastaǵany qýanyshty jańalyq dep sanaý kerek. Bul jastardy ortaq tarıhymyz negizinde tárbıeleıtin tıimdi tetigi bolady dep senemin. Sonymen qatar Túrki akademıasy tarıhymyzdy tanytyp, sanany jańǵyrtýǵa baǵyttalǵan 90-nan astam kitap shyǵardy. Tórt myń jyldyq mádenı muramyzdy jınaqtap, ony jarııalaýǵa arnalǵan atalar murasy portaly iske qosyldy», dedi Nursultan Nazarbaev.
Túrkitildes memleketterdiń yntymaqtastyǵy keńesi 2009 jyly Qazaqstan Respýblıkasy Prezıdentiniń bastamasymen Nahchyvan qalasynda (Ázerbaıjan) quryldy. Qazirgi ýaqytta Keńestiń quramyna Ázerbaıjan, Qazaqstan, Qyrǵyzstan jáne Túrkııa kiredi. Túrki keńesiniń Bas hatshylyǵy Ystanbul qalasynda (Túrkııa) ornalasqan.
Abaı ASANKELDIULY,
"Egemen Qazaqstan"
