– Jeńis qutty bolsyn, Dildásh!
– Rahmet, aǵa! Bul bárimizdiń ortaq jeńisimiz. Ásirese samboshylar qaýymy qatty qýanyp jatyr. Sebebi sporttyń bul túri jazǵy Azııa oıyndarynyń baǵdarlamasyna tuńǵysh ret enip otyr. Indonezııa astanasynda qyzdar 48 jáne 69 kılo, al erler 58 jáne 90 kılo salmaqtarda beldesti. Aldaǵy ýaqytta Azıadada salmaq dárejeleri artsa, qazaqstandyq samboshylardyń jeńip alǵan júldeleri áldeqaıda kóp bolatynyna senimdimin.
– Djakartadaǵy jarys qalaı ótti? Qandaı myqty qarsylastarmen kezdestiń?
– Tusaýkeser kezdesýde Qyrǵyzstannan kelgen qyzdy «aýyrtý» ádisimen uttym. Kelesi kezeń óte aýyr boldy. Japonııanyń balýany óte myqty eken. Uzaq ýaqyt ekeýmiz bir-birimizdiń osal tusymyzdy taba almaı, ábden qara terge tústik. Desek te ońtaıly tusta bir upaı oljalap, jeńisti qarsylasymnyń ýysynan julyp ákettim. Jartylaı fınalda Mońǵolııanyń jáne aqtyq synda О́zbekstannyń ókilinen aılamdy asyryp, altyn tuǵyrǵa kóterildim.
– Jeńis tuǵyryna kóterilgende erekshe kúı keshken bolarsyń...
– Árıne ony sózben jetkizý qıyn. Tórt jylda bir ótetin osyndaı dúbirli dodada el úmitin aqtap, qazaqtyń ánuranyn shyrqata alǵanyma qatty qýandym, aıryqsha shattandym, keýdemdi maqtanysh sezimi kernedi.
– Osy sport túrin qaı jerde meńgerdiń? Balýandyq ónerdegi ustazyń kim?
– О́zimniń týyp-ósken ólkem – Almaty oblysy, Kerbulaq aýdanynyń ortalyǵy Saryózek kentinde sambonyń qyr-syryna qanyqtym. Alǵash ret jattyǵý zalyna kelgende 13 jasta edim. 12 jyl boıy bul ónerge meni elimizge eńbek sińirgen jattyqtyrýshy Baqyt Qoqysbekov baýlydy. Kezinde ol kisi shaǵyn ǵana Qoıankóz aýlynan Berik Jetpisbaev pen Meıirjan Qashaǵanov syndy álem jáne Azııa chempıonatynyń jeńimpazdary men júldegerlerin shyǵardy. Ýaqyt oza osyndaı bilikti bapkerden tálim-tárbıe alý baqyty maǵan da buıyrdy. Qazir de Baqyt aǵanyń qol astynda jattyǵamyn.
– Dildásh, Azııa oıyndaryna deıin de kópshilik nazarynda júrdiń. Osy sport túrinde qol jetkizgen tabystaryń jaıynda qysqasha baıandap berseń?
– 2013-2016 jyldar aralyǵynda áıelder arasynda ótken álem chempıonattarynda tórt márte jeńis tuǵyryna kóterildim. Sankt-Peterbýrg, Kasablanka jáne Sofııada qola medal alsam, Narıtada kúmis júldege qolym jetti. Qatarynan tórt ret Azııa birinshiliginde jeńimpaz atandym. 2013 jyly Dúnıejúzilik Ýnıversıadada úshinshi tuǵyrǵa tabanym tıse, 2017 jyly jabyq ǵımarattaǵy Azııa oıyndarynda altynnan alqa taǵyndym. Basqa da halyqaralyq jáne respýblıkalyq jarystarda jeńip alǵan júldelerim taǵy bar.
– Endigi armanyń qandaı?
– Sambodan álem chempıonatynda tórt ret jeńis tuǵyryna kóterilgenimen, bas júldege áli de qolym jetpeı júr. Sol belesti baǵyndyrǵym keledi. Dzıýdo kúresinen de baq synap, Olımpııa oıyndarynda atoı salýdy armandaımyn.
– Kóp rahmet, Dildásh! Alǵa qoıǵan maqsatyńa qol jetkizýińe tilektespiz.
Áńgimelesken
Ǵalym SÚLEIMEN,
«Egemen Qazaqstan»
