Atap ótsek, aımaqta 396 jekemenshik balabaqsha bar, ıaǵnı mektepke deıingi bilim mekemeleriniń jalpy sanynyń 75 paıyzyn quraıdy. Bul respýblıka boıynsha eń jaqsy kórsetkish.
«Biz memlekettik-jekemenshik áriptestik sheńberinde salynǵan birqatar balabaqshalardyń, nysandardyń jumysymen tanystyq. Áriptesterimizben birge Qyzylorda oblysyndaǵy bul tájirıbeni úzdik úlgi retinde respýblıka boıynsha engizý kerek dep oılaımyz», - dedi Birǵanym Áıtimova.
Qazirgi tańda memlekettik-jekemenshik áriptestik aıasynda óńirde 75 joba júzege asyrylýda. Olardyń 29-y densaýlyq saqtaý; 12-si dene shynyqtyrý jáne sport; 10-y turǵyn úı-kommýnaldyq sharýashylyq; 8-i bilim berý; 7-eýi sıfrlandyrý; 5-eýi jolaýshylar kóligi jáne avtomobıl joldary salalaryna tıesili bolsa, al mádenıet, áleýmettik qamsyzdandyrý, qoǵamdyq tártip jáne ekologııa salalarynda 1 jobadan júzege asyrylýda.
Eske salaıyq, Qyzylorda oblysyna QR Parlamenti Senatynyń depýtattary jumys saparymen kelgen bolatyn. Issapar barysynda olar Syr óńirindegi áleýmettik nysandardyń jumysymen tanysty. Sondaı-aq, Syrdarııa, Qarmaqshy jáne Aral aýdandary men Baıqońyr qalasynyń áleýmettik-mádenı nysandaryn aralaıdy.
