Is-sharanyń ashylýynda Memlekettik hatshy rásimge qatysýshylarǵa Elbasy N.Á.Nazarbaevtyń quttyqtaý sózin oqyp berdi. Onda otbasy ınstıtýtyn nyǵaıtý táýelsizdik jyldary memleketimizdiń áleýmettik saıasatyna aınalǵany aıtylǵan. Bul baǵytta mańyzdy sheshimder qabyldandy. Elimizde jyl saıyn Otbasy kúni meıramyn atap ótý, «Mereıli otbasy» ulttyq konkýrsyn uıymdastyrý dástúrge aınaldy.
Búginde júzege asyrylyp jatqan «Prezıdenttiń bes áleýmettik bastamasy» sııaqty jalpyulttyq jobalar qazaqstandyqtardyń ál-aýqatyn arttyrýǵa baǵyttalǵan. Olar jahandyq úrdisterge súıene otyryp, qamqorlyq pen kómekti udaıy jalǵastyrýda. Otansúıgishtik, eńbekqorlyq, meıirimdilik pen qaıyrymdylyq sııaqty kıeli qundylyqtardy boıyna sińirgen otbasylardyń ókilderi konkýrs jeńimpazdary bolady.
Saltanatty is-shara aıasynda Memlekettik hatshy aqyrǵy kezeńge ótken árbir otbasyǵa dıplom men baǵaly syılyqtardy tapsyrdy.
Jeńimpaz otbasy konkýrstyń 31 tamyz ben 7 qyrkúıek aralyǵynda sms/ınternet arqyly daýys berilgen sońǵy kezeńiniń qorytyndysy boıynsha anyqtaldy. Jambyl oblysynan qatysqan Nııazqulovtar áýleti «Mereıli otbasy» ulttyq konkýrsynyń 2018 jylǵy laýreaty atandy. Otaǵasy Nııazqulov Úmen (83 jasta) 40 jyldan astam ýaqyt aýyl mektebinde muǵalim, dırektor bolyp eńbek etken. Zaıyby Nııazqulova Baıan (80 jasta) 26 jyl bastaýysh synyp muǵalimi bolyp jumys istegen. Aǵa býynnyń pedagogıkalyq qyzmetin balalary men nemereleri jalǵastyrýda. Áýlettiń 3 býynynyń jalpy pedagogıkalyq ótili – 198 jyl. Erli-zaıyptylar 62 jyl birge ómir súrip keledi, 12 bala, 32 nemere, 20 shóbere tárbıelep-ósirip otyr.
QR Memlekettik hatshysy G.N.Ábdiqalyqova jeńimpaz otbasyǵa saltanatty túrde estelik músinshe men avtokólik kiltin tabys etti.
Marapattaý rásimi qazaqstandyq tanymal estrada ártisteri qatysqan merekelik konsertpen aıaqtaldy.
