Bul týraly búgin Astanada «Báıterek» holdınginiń basshysy Aıdar Áriphanovtyń tóraǵalyq etýimen ótken banktiń Dırektorlary keńesi otyrysynda belgili boldy.
Turǵyn úı qurylys jınaq banki basqarma tóraıymy Lázzat Ibragımova alǵashqy jartyjyldyqta jasalǵan jumys týraly esep bere kele, banktiń depozıttik bazasynyń 5,6%-ǵa óskenin atap ótti. Eseptik kezeń nátıjesi boıynsha, Turǵyn úı qurylys jınaq banki halyqtyń uzaqmerzimdi salymdary naryǵynda 1-orynǵa ıe bolyp otyr. Jınaqtardyń jalpy somasy 549 mlrd teńgeni quraıdy. Bul ekinshi deńgeıli bankterdiń jalpy depozıttik qorjynynyń 26%-na teń. 2018 jyldyń 6 aıy ishinde bankte turǵyn úı qurylys jınaq júıesi týraly 204 915 jańa kelisim-shart bekitilgen.
Atalǵan kezeń ishindegi banktiń nesıe qorjyny da ósim kórsetip otyr. 2018 jyldyń 1 shildesindegi statıstıkaǵa sáıkes, nesıe qorjyny 527,8 mlrd teńgeni quraıdy, bul jyl basyndaǵy kórsetkishke qaraǵanda 63,3 mln teńgege artyq. Osyǵan qaramastan, banktiń NPL deńgeıi (ýaqtyly ótelmegen, óteý merzimi 90 kúnnen asyp ketken) 0,05%-ǵa tómendep, 0,25%-ǵa deıin túsken. 2017 jyldyń qorytyndysy boıynsha banktegi NPL deńgeıi 0,30%-dy quraǵan bolatyn.
Keltirilgen esepke sáıkes, Turǵyn úı qurylys jınaq banki jetkilikti deńgeıdegi ótimdilik qoryna ıe. Ulttyq banktiń qarjy ınstıtýty turaqtylyǵyn qamtamasyz etý úshin talap etetin kórsetkishteri de (prýdensıaldyq normatıvter qory) úsh ese joǵary bolyp otyr.
Budan bólek Dırektorlar keńesi otyrysynda bıýdjettiń jáne bank rentabeldigi kórsetkishteriniń oryndalýy týraly, qarjy táýekelderin basqarý jónindegi jáne basqa Turǵyn úı qurylys jınaq banki qyzmeti nátıjelerine qatysty birqatar esepter qarastyrylyp, bekitildi.
