Q. Toqaev Qazaqstanda Qytaımen strategııalyq áriptestikti damytýǵa erekshe mán beriletinin atap ótti. Senat Tóraǵasy Prezıdent Nursultan Nazarbaev pen Qytaı Tóraǵasy Sı Szınpın arasyndaǵy senimdi qatynastar ózara tabysty is-qımyldyń kepili ekenin jáne olar qol jetkizgen ýaǵdalastyqtarda ekijaqty qatynastardyń mazmuny men kún tártibi belgilenetinin atap ótti.
Taraptar «Bir beldeý, bir jol» jahandyq bastamanyń quramdas bóligine aınalǵan qytaılyq «Jibek joly ekonomıkalyq beldeýi» strategııasy aıasyndaǵy yntymaqtastyqqa joǵary baǵa berdi. Q.Toqaevtyń pikirinshe, bul bastama tabysty iske asqanda ekijaqty yntymaqtastyqqa kúshti serpin berip, jahandyq ekonomıkany baıaý qalyptan ornyqty damý jolyna shyǵarýǵa yqpal etedi. Bul turǵyda «Nurly jol» baǵdarlamasy men qytaılyq strategııanyń ushtasýynyń máni erekshe zor. Tóraǵa Qazaqstan men QHR-dyń jańǵyrý máseleleri boıynsha tájirıbe jáne aqparat almasý úshin eki eldiń túrli mekemeleri arasynda yntymaqtastyq pen ózara is-qımyl qalyptastyrý qajet dep sanaıdy.
Senat Tóraǵasy ekijaqty saıası únqatysýdyń mańyzdy bóligi bolyp tabylatyn parlamentaralyq baılanystarǵa qarqyn berýge nazar aýdardy jáne Halyq О́kilderiniń Búkilqytaı Jınalysy Turaqty komıteti Tóraǵasynyń Qazaqstanǵa aldaǵy sapary yntymaqtastyqqa eleýli serpin beretinin atap ótti.
«Bizdiń elderimizdiń úkimet organdary arasyndaǵy baılanystar men konsýltasııalardy belsendi júrgizý eki eldiń túrli saladaǵy baılanystarynyń mańyzdy baǵyttary bolyp tabylady. Týyndaǵan barlyq máseleler dostyq rýhy men ózara qurmet aıasynda, mámilege kelý negizinde, eń aldymen dıplomatııalyq joldarmen sheshilýi tıis», - dep atap ótti Q.Toqaev.
Q. Toqaev Astana QHR Shyńjań-Uıǵyr avtonomııalyq aýdanymen turaqty, ornyqty jáne qaýipsiz damýǵa múddeli ekenin, sondyqtan osy aımaqtyń ekonomıkalyq jetistikterine jiti nazar aýdarylyp otyratynyn aıtty. Qazaqstan sonymen qatar ekijaqty deńgeıdegi jáne kóptarapty sıpattaǵy, eń aldymen terrorızm, separatızm jáne ekstremızmge qarsy kúreste ShYU aıasyndaǵy yntymaqtastyqqa da múddeli.
