Osy bir demeý ásirese, jalǵyzbasty analarǵa jaqsy bolyp tur. Jumyspen qamtý ortalyqtary kómektiń bul túri shalǵaıdaǵy shaǵyn aýyldar úshin mańyzdy ekendigin aıtyp otyr. Áleýmettik jaǵynan az qamtylǵan otbasylar úshin qalaı bolǵan kúnde de táp-táýir talǵajaý. Kómek aıasynda járdemaqymen qosa turǵyndarǵa turaqty tabys kózi, jumys orny da usynylady. Qorǵaljyn aýdandyq jumyspen qamtý ortalyǵy osy jyly 700-ge jýyq turǵyndy áleýmettik kómekpen qamtýǵa tıis bolatyn.
– Ataýly kómek boıynsha bıyl respýblıkalyq bıýdjetten 17 mıllıon 363 myń teńge qarajat bólindi. Bul qarajat 105 otbasyǵa eseptelip otyr. Ázirge 480 adamdy quraıtyn 96 otbasy qamtyldy. Kómektiń eki túri bar: shartty jáne shartsyz. Kómek alý úshin áleýmettik jaǵdaıy tómen otbasylar, múgedekter men kópbalaly otbasylar ótinim jasaı alady. Shartsyz áleýmettik kómek degenimiz – jalǵyz basty analarǵa, zeınetkerlerge, birinshi jáne ekinshi toptaǵy múgedekterge aı saıyn tólenetin tólem. Shartty kómek jumyspen qamtýǵa járdemdesý jáne qajet bolǵan jaǵdaıda áleýmettik beıimdeý sharalaryna qatysýdy kózdeıdi, – deıdi aýdandyq jumyspen qamtý ortalyǵynyń dırektory Asylbek Mustafın.
Joǵaryda aıtylǵan kómek túrleri 3-6 aıǵa taǵaıyndalady eken. Qajet bolǵan tusta merzimi odan da uzartylýy múmkin. Osyndaı sharanyń nátıjesinde turmysyn jaqsartqan adamdardyń biri – Zýlfııa Idııatýllına. Jalǵyzbasty anaǵa ortalyq mamandary turaqty jumys ornyn taýyp beripti.
– Áleýmettik kómek qysylǵanda kóp-kórim demeý boldy. Ortalyq mamandary el ishinde áleýmettik kómek týraly aqparat taratty. Men qujattarymdy jınap bardym. Komıssııa otyrysynan keıin aı saıyn ózime jáne balalaryma 47672 teńge kómek kórsetiletin boldy. Bul shalǵaıdaǵy shaǵyn aýyldyń jumyssyz otyrǵan turǵyny úshin nápaqa. Eń bastysy, jergilikti qoryqqa baǵban bolyp jumysqa ornalastym, – deıdi ol.
Turaqty jumys istep, tabys tapqanǵa ne jetsin, shirkin. Qazir jalǵyzbasty ana eshkimge alaqan jaıyp otyrǵan joq. О́z eńbeginiń arqasynda jetilip keledi. Balalaryn da jańa oqý jylyna jaqsylap ázirledi.
Ataýly áleýmettik kómek birdiń ǵana emes, myńnyń jaǵdaıyn jaqsartýǵa septigin tıgizip otyr. Qarapaıym halyq kóńilge dem bergen kómek óz eńbegine jalynatyn kásip taýyp berýimen qundy deıdi.
Baıqal BAIÁDIL,
«Egemen Qazaqstan»
Aqmola oblysy,
Qorǵaljyn aýdany
