Bir partada – úsh oqýshy
Oblystyq bilim berý basqarmasynyń basshysy Qaıyrǵalı Kenjeǵalıevtiń aıtýynsha, óńirde 193 memlekettik, 4 jekemenshik mektep bar. Onyń ishinde 4 mektep apatty jaǵdaıda dep tanylǵan. Jańa oqý jyly qarsańynda 2 mektep, 3 balabaqsha ashyldy. Sonyń ózinde oqýshy sanynyń kóptiginen úsh aýysymda oqıtyn bilim uıalarynyń qatary kemir emes. Kerisinshe, ósip barady. Byltyr 9 mektep úsh aýysymda oqysa, bıyl bul kórsetkish 11-ge jetti. 600 oqýshyǵa arnalǵan bilim oshaǵynda 2 myń bala sabaq oqýǵa májbúr. Osy olqylyqtyń ornyn toltyrý úshin oblys ortalyǵyndaǵy №34, 17, 27, 22 mektepterge qosymsha ǵımarat salýǵa jobalaý-smetalyq qujattama daıyndalyp jatyr. Apatty jaǵdaıdaǵy M.Jumabaev pen Ǵ.Muratbaev mektepteriniń shákirtteri kórshiles mektepterge baryp oqyp júr. Alda qaharly qys kele jatqanyn eskersek, bul jaǵdaı balalar men ata-analar úshin qolaısyzdyq týdyrary anyq. Munaıly óńirde jyl saıyn jańa mektep, balabaqshalar salynady, eskileri jańartylady, qosymsha ǵımarattar turǵyzylady, sonyń ózinde oryn jetpeý máselesi kún tártibinen túser emes. Á.Moldaǵulova atyndaǵy orta mektep dırektory Aqsulý Sálıeva úsh aýysymda oqytýdyń kedergileri kóp ekenin aıtady. Oqýshy sanynyń normaǵa saı bolmaýy, úsh-tórt balanyń bir partada tyǵylysyp otyrýy bilim sapasyna áser etetini taǵy bar.
380 muǵalim kerek
Munaıly aımaqtaǵy mektepterde 380 muǵalimniń orny bos tur. Ásirese bastaýysh synyp pen matematıka pániniń muǵalimine suranys joǵary. Orys tilinde oqytatyn bilim mekemelerine de pedagog kadrlar kerek. H.Dosmuhamedov atyndaǵy Atyraý memlekettik ýnıversıteti 19 pedagogıkalyq mamandyq boıynsha oqytady. «О́tken oqý jylynda 248 jas maman ýnıversıtet bitirdi. Jyl saıyn túlekterdi jumysqa ornalastyrýǵa arnalǵan jármeńke bolady. Osy sharada 136 qazaq, 22 orys synyptarynyń muǵalimderi shaqyrtý aldy. Oryssha sabaq beretin 222 muǵalimge suranys túsken edi, biraq sonyń 10 prosentimen ǵana qamtamasyz etýge múmkindigimiz boldy», deıdi ýnıversıtettiń akademııalyq máseleler departamentiniń basshysy Ashat Shúkirov. Orys tildi mektepterge muǵalim jetispeý problemasy burynnan bar. Sol úshin oblystyq ákimdik tarapynan muǵalim bolamyn degen jastarǵa qoldaý uıymdastyrylady, mysaly ótken jyly 158, bıyl 187 grant bólingen. Grantpen oqyp jatqan stýdentter endi eki jyldan keıin oqý bitiredi, múmkin sol kezde seń azdap bolsa da qozǵalar. Ázirge másele ashyq kúıinde qalyp otyr. Bilim berý basqarmasy kórshiles óńirlerdegi oqý oryndarynyń túlekterin Atyraýǵa shaqyryp, jumys usynýdy da qolǵa alǵan. Sonyń ózinde, jaǵdaı joǵarydaǵydaı.
Balabaqshaǵa – onlaın kezek
Balabaqshaǵa ótinishti qanshalyqty erte berseńiz, joldama alý múmkindigi de jaqyndaı túsedi. Oqý jylynyń basynda garden.atyrau.gov.kz saıty iske qosyldy. Endi ınternetpen balabaqsha tańdaýǵa, mektepke deıingi mekemelerge kezegińizdi qadaǵalaýǵa, sms, e-mail habarlama arqyly keri baılanys ornatýǵa múmkindik bar. «Bul ata-analardyń ýaqytyn únemdeýge, sybaılas jemqorlyq táýekelin boldyrmaýǵa septigin tıgizedi», deıdi Atyraý qalalyq bilim bólimi basshysynyń mindetin atqarýshy Almabek Abdolov. Buryn balabaqshaǵa kezek elektrondy júıede kórsetilgenimen, joldamany qalalyq bilim bólimi beretin. Endi respýblıka boıynsha engizilgen biryńǵaı standarttyń negizinde júıe avtomatty túrde bárin ózi rettep otyrady. Bilim bóliminiń málimetine súıenip aıtar bolsaq, oblys ortalyǵyndaǵy 42 memlekettik balabaqshaǵa 13 myńnan astam bala baryp júr. Al kezekte áli de 22 408 bala tur.
Árıne munaıly óńirdegi bilim berý salasynda jaqsy jańalyqtar da bar. Jaqynda bilim kúnine arnalǵan saltanatty sharada oblys ákimi Nurlan Noǵaev ótken oqý jylynda 71 atyraýlyq oqýshynyń túrli óner, bilim jarystarynda júldeger atanyp, 20 oqýshynyń halyqaralyq baıqaýlarda top jarǵanyn erekshe atap aıtqan edi. «Zaman talabyna saı jańa tehnologııalardy damytýǵa jáne ony balalardyń meńgerýine kóńil bólip kelemiz. IT-synyptar ashylyp jatyr, oqý oryndarynyń 90%-ten astamy keń jolaqty ınternet júıesine qosylǵan. Bıyldan bastap oblystaǵy mektepterde 45 robottehnıka synyptary jumys isteıdi. Jyl sońyna deıin bilim berý salasynda taǵy da jańa nysandar ashylady», degen edi óńir basshysy. Qazir óńirde 5 mekteptiń qurylysy júrip jatyr, jyl sońyna deıin paıdalanýǵa beriledi degen jospar bar. Qurylys qarqyny osy baǵytynan taımasa, jaqyn jyldary mektep men balabaqshada oryn tapshylyǵy máselesi de ótken kúnniń enshisinde qalar degen úmit basym.
Baqytgúl BABASh,
«Egemen Qazaqstan»
ATYRAÝ
