«Prezıdent Nursultan Nazarbaevtyń syrtqy saıasaty Qazaqstan Respýblıkasynyń ulttyq múddelerin turaqty jáne dáıekti túrde qorǵaý, elimizdiń turaqty damýy úshin qolaıly syrtqy ortany qalyptastyrý, ınvestısııalar tartý, óńirlik kooperasııa jáne sheteldegi Qazaqstan azamattarynyń quqyqtaryn qorǵaý bolyp tabylady. Syrtqy saıasattyń mindetterin naq osylaı túsinýge baılanysty Memleket basshysy halyqaralyq bastamalardy kóteredi», – dep atap ótti Syrtqy ister mınıstri Qaırat Ábdirahmanov «Dıplomatııa beıbitshilik, yntymaqtastyq jáne damý qyzmetinde» atty maqalasynda.
Prezıdent Nursultan Nazarbaev bastamasymen qurylǵan Álemdik jáne dástúrli dinder kóshbasshylarynyń sezi álemde teńdesi joq biregeı forým bolyp tabylady. Din men saıasattyń jáne halyqaralyq qaýipsizdiktiń bir-birimen tyǵyz baılanysy forým ıdeıasynyń ózektiligin jyl saıyn arttyrýda. Atalǵan basylymda Qazaqstan Respýblıkasy Parlamenti Senatynyń Tóraǵasy, Sez Hatshylyǵynyń basshysy Qasym-Jomart Toqaevtyń 15 jyldyq tarıhy bar forýmnyń róli, damýy men negizgi jetistikteri týraly maqalasy jarııalandy.
«Beldeý men jol» aýqymdy ekonomıkalyq jobasy kontınentimizdiń saýda-logıstıkalyq kartasynyń mańyzdy bóligi bolyp tabylady. Bul joba «Nurly jol» memlekettik baǵdarlamasy, «Qorǵas – Shyǵys qaqpasy» ekonomıkalyq aımaǵy jáne AHQO-men birge Qazaqstan úshin Eýrazııadaǵy eń mańyzdy saýda, logıstıkalyq jáne qarjy haby bolýǵa múmkindik beredi. Osyǵan baılanysty jaryq kórgen basylymda birqatar maqalalar Qazaqstan-Qytaı yntymaqtastyǵy men «Beldeý men jol» bastamasy taqyrybyna arnalǵan.
Sonymen qatar, jýrnalda Fransııamen strategııalyq áriptestik týraly shartty júzege asyrýdyń alǵashqy onjyldyǵynyń qorytyndylary, Qazaqstannyń sheteldegi konsýldyq qyzmeti, AHQO-nyń Qarjylyq komıtetiniń róli, Qazaqstandaǵy iri nemis ınvestory Knauf kompanııasy týraly materıaldar jáne halyqaralyq sıpattaǵy basqa da ózekti taqyryptar oqyrman qaýymǵa usynylyp otyr.
«Dıplomatııa jarshysy» qazaq, orys («Vestnık dıplomatıı») jáne aǵylshyn (The Diplomatic Herald of Kazakhstan) tilderinde basyp shyǵarylady.
