«Qanshama alash qaıratkerleri basshylyq etken basylymnyń 100 jyldyq tarıhy bar. Elimizdiń irili-usaq merzimdi baspasózderin gazettiń shyǵarmashylyq-óndiristik áleýetimen tanystyrý týraly usynys budan buryn aıtylǵan bolatyn. Bul – elimizdiń aqparat keńistiginiń aıasyn keńeıtýge yqpal etetin qadam. О́ıtkeni, gazet – tildik óristiń aıqyn kórinisi», degen «Egemen Qazaqstan» respýblıkalyq gazeti» AQ Basqarma tóraǵasy Darhan Qydyráli ǵasyr bederindegi basylymnyń búgingi mazmuny men jańasha baǵyt-baǵdaryna keńinen toqtalyp ótti. Basqarma tóraǵasynyń aıtýynsha, qashan da oqyrmanmen qaltqysyz qarym-qatynas ornatýdy kózdegen basylym jastar aýdıtorııasyna basa mán berip otyr.
– Materıaldardyń berilýi turǵysynan ǵana emes, mazmundyq jaǵynan aýdıtorııamyzdy durys aıqyndaýdy uıǵardyq. Sońǵy saraptaýlarymyz boıynsha, bizdiń oqyrmandarymyzdyń 67 prosenti 18 ben 34 jas aralyǵynda. Bul – óte jaqsy kórsetkish, – deıdi ol.
Sondaı-aq, bas basylymnyń 100 jyldyq qarsańyndaǵy qol jetkizgen ózge de tyń jańalyqtarymen habardar ete kele, el ómirin keńinen tanystyrýda jáne sheshilýi tıis ulttyq jáne memlekettik mindetterdiń árdaıym basty nazarda ekenin atap ótti. Avtorlyq baǵandardy latyn álipbıimen jarııalaı bastaǵan gazet aldaǵy kúnderi «Rýhanı jańǵyrý» syndy tutastaı bir betin latyn grafıkasyndaǵy qazaq álipbıimen basýdy qolǵa almaq.
Shyǵysqazaqstandyq jýrnalıster men basylym ujymy kezdesý barysynda jýrnalıstıkanyń búgingi mindeti, gazettiń dızaındyq ereksheligi men mazmundyq-ıdeıalyq alýandyǵy turǵysynda ózara oı-pikir almasyp, jan-jaqty maǵlumatqa qanyqty. Aımaq jýrnalısteri el ómirinde aıryqsha orny bar irgeli basylymnyń zaman aǵymyna saı jańasha túrlenýiniń quptarlyq qadam ekenin aıta kele, bolashaqta da osy bıikten tabyla bersin degen nıettestigin jetkizdi.
Aıa О́MIRTAI,
Sýretti túsirgen Erlan OMAR,
«Egemen Qazaqstan»
