Áleýmettik-mádenı damý jáne ǵylym komıtetiniń tóraǵasy Birǵanym Áıtimova óz sózinde kóptegen memleketter qoǵamdaǵy demografııalyq qurylymnyń ózgeristerine baılanysty zeınetaqy salasyndaǵy ózekti máselelerge tap bolyp otyrǵanyn atap ótti. Bizdiń elimiz de bul kúrdeli máseleden aınalyp óte almaıtyny aqıqat. Senator keıingi kezde jurtshylyq pen buqaralyq aqparat quraldary zeınetaqy jarnalary tóleý máselelerine jıi nazar aýdaryp otyrǵany týraly aıtty.
B.Áıtimovanyń aıtýynsha, kezdesýdiń maqsaty – Qazaqstan azamattaryn alańdatyp otyrǵan zeınetaqymen qamsyzdandyrý máselelerin birlesip talqylaý jáne zeınetaqy júıesin bolashaqta damytýdyń keleshegin qarastyrý bolyp tabylady.
«BJZQ» aksıonerlik qoǵamynyń Basqarma tóraǵasy Nurbúbi Naýryzbaeva óz baıandamasynda qordyń qyzmeti men jınaqtaýshy zeınetaqy júıesindegi ózgerister týraly depýtattardy habardar etti. Atap aıtqanda, qazir memlekettik bıýdjet tólemderi basym bolsa, bolashaqtaǵy zeınetaqymen qamsyzdandyrý júıesi boıynsha jeke zeınetaqy jınaqtary úlesi ulaıatyny aıtyldy. Máselen, qazir 2017 jyldyń qorytyndysy boıynsha barlyq tólemder 12 paıyzdy qurasa, 2050 jylǵa qaraı tólemder úlesi 46 paıyzǵa deıin ósetin bolady.
BJZQ derekteri boıynsha, zeınetaqy jınaqtarynyń jyldyq ortasha ósimi shamamen 20 paıyzdy quraıdy. Elimizdiń Jalpy ishki ónimi men zeınetaqy jınaq somasynyń qatynasy jyldan jylǵa ósip keledi. BJZQ qurylǵan sátten bastap bul kórsetkish ótken jyly bir jarym esege (10-nan 15 paıyzǵa deıin) artty. Osy jyldyń 1 shildedegi jaǵdaı boıynsha, zeınetaqy jınaǵynyń kólemi 8,4 trln teńgege jetti, onyń 63 paıyzy salynǵan jarnalardyń esebinen, al 37 paıyzy ınvestısııalyq tabys esebinen quraldy.
N.Naýryzbaeva atap ótkendeı, 2017 jyl men 2018 jyldyń birinshi jarty jyldyǵynyń qorytyndylary boıynsha, zeınetaqy aktıvteriniń kirisi ınflıasııa deńgeıinen asyp otyr. Jalpy alǵanda, jınaqtaýshy zeınetaqy júıesiniń barlyq kezeńinde jınaqtalǵan kiris deńgeıi 481,1 paıyzdy qurap, jınaqtalǵan ınflıasııa deńgeıinen (474.2 paıyz) asty.
2017-2021 jyldardaǵy BJZQ damýynyń basty maqsattary bylaısha belgilendi:
- zeınetaqy jónindegi qyzmetterdi sapaly kórsetý;
- halyq arasynda zeınetaqy josparlaý mádenıetin damytý;
- jınaqtaýshy zeınetaqy júıesin odan ári damytý baǵyttary boıynsha zańnamalyq bastamalardy júzege asyrý.
N.Naýryzbaeva osy salalardyń árqaısysy boıynsha júrgizilip jatqan jumystar týraly parlamentshilerge áńgimelep berdi.
Senat depýtattary Murat Baqtııaruly, Narıman Tóreǵalıev, Serik Bekturǵanov, Olga Perepechına, Sergeı Ershov, Dınar Nóketaeva, Nurlan Qylyshbaev saýaldar qoıyp, zeınetaqy jarnalaryn qorǵaý, jınaqtaýshy zeınetaqy júıesiniń tıimdi jumys isteýi, sondaı-aq zeınetaqymen qamtamasyz etý máseleleri jónindegi zańnamany odan ári jetildirý qajettigi týraly birqatar usynystar aıtty:
Talqylaýǵa Ulttyq banki, Eńbek jáne halyqty áleýmettik qorǵaý, Qarjy mınıstrlikteriniń ókilderi, sondaı-aq táýelsiz sarapshylar qatysty.
