Olaı deýimizge qoldaý tapqan «Túrkistan oblysynyń ákimshilik-aýmaqtyq birlikterin qaıta ataý týraly» jáne «Túrkistan oblysy Túrkistan qalasynyń ataýy joq kóshelerine ataý berý týraly» oblystyq máslıhat sheshiminiń jobasy da sebep bolyp otyr. Osy sheshimge sáıkes, Túrkistan qalasyndaǵy «32-Razezd» eldi mekeni Qarsaqty bolyp ózgertilse, «30-Razezd» eldi mekeni Eski Saýran dep atalady. Sonymen qatar, Túrkistan qalasyndaǵy aty joq 330 kóshege ataýlar beriledi.
Osyǵan sáıkes, oblys ortalyǵynda Kúltegin, Qaztýǵan jyraý, Hanqorǵan, Alty Alash, Máńgilik El, Elim-aı, Bolat han, Kúltóbe jáne ózge de kósheler paıda bolady. Taǵy bir belgilisi Túrkistandy bilimge qushtar jastardyń qalasyna aınaldyrý kózdelgen. Bul oraıda Qoja Ahmet Iаsaýı atyndaǵy halyqaralyq qazaq-túrik ýnıversıtetiniń janynan álemniń ozyq tilderin úıretetin ortalyq qurý joldary qarastyrylmaq.
Jańadan boı kóteretin nysandar da asa bıik bolmaı, shyǵystyq qalypta salynbaq. Al endi qurylys kompanııalary mundaı talaptardy oryndaı ala ma, ol ekinshi máseledegi áńgime. Jýyrda Túrkistan oblysynyń ákimi Janseıit Túımebaev «Haıvıll Qazaqstan» kompanııasynyń bas dırektory Djon De Kangty qabyldaǵan bolatyn. Árıne áńgime Túrkistan qalasyn damytý men ekijaqty áriptestikti kúsheıtý tóńireginde órbigen. Erteńgi tapsyrystaǵy talaptardy qup kórse, qurylys salasynda ózindik orny bar koreıalyq kompanııamen birlesip jumys isteýge oblys daıyn. Koreıalyq qurylysshyǵa Túrkistan qalasyn damytý Elbasy Nursultan Nazarbaevtyń tikeleı baqylaýynda turǵanyn eskertken oblys ákimi qazirdiń ózinde ǵımarattar salýǵa kóptegen kompanııalar qyzyǵýshylyq tanytyp otyrǵanyn da qulaqqaǵys etti.
Birge jumys isteýge shaqyrdy. Kelissóz sátti aıaqtalsa, jer berilip, ınfraqurylym tartylatynyn da, zaman talabyna saı nysandardy salýǵa múmkindikteri bar ekenin de bildirdi. Al «Haıvıll Qazaqstan» kompanııasynyń bas dırektory Djon De Kang Túrkistan qalasynda túrli áleýmettik nysandar men kópqabatty úıler salýǵa nıetti ekenin jetkizdi. Oblys ákimdigi men kompanııa basshylyǵy aldaǵy ýaqytta da kelissózderdi jalǵastyrýǵa ýaǵdalasty.
Árıne oblys ortalyǵyn damytý, birinshi kezekte qajetti nysandar qurylysyn qarqyndy júrgizý búginde kún tártibindegi mańyzdy másele. Degenmen, oblys ákimdigi óńirge ınvestısııa tartýdy da nazardan tys qaldyrǵan emes. Jýyrda Túrkistan oblysynyń delegasııasy Ankarada ótken qazaqstandyq-túrkııalyq bıznes forýmda Túrkııanyń iri holdıngteri men kompanııalary basshylarymen kelissóz júrgizdi. Qos eldiń 200-den astam resmı tulǵalary men iri kásipkerleri qatysqan forýmda túrik ınvestorlaryna Túrkistannyń ınvestısııalyq tartymdylyǵy men ary qaraı damytýǵa jáne keńeıtýge bolatyn salalary tanystyryldy. Jeńil ónerkásip, agroónerkásiptik keshen jáne týrızm salasyndaǵy múmkindikter de saralanǵan. Kelissózder nátıjesinde Túrkııanyń «DAL Holding Investment Company» holdıngi Túrkistan oblysynyń 200 ga jer aýmaǵynda ınvestısııalyq quny 500 mln. AQSh dollaryn quraıtyn jylyjaı salýǵa nıet bildiripti. Jobany júzege asyrý barysynda jylyjaı aýmaǵynda tońazytqysh ári kókónis qoımasy salynyp, 1000-nan astam jumys orny ashylady.
Al túrkııalyq «Dilmen Dekorasyon inş. Taah. Tic. Ltd Şti» atty kompanııasy kelesi jyly Túrkistan oblysynda jıhaz shyǵaratyn fabrıkanyń qurylysyn bastamaq. Tartylatyn ınvestısııa kólemi - 5 mln. AQSh dollary. Forým barysynda «Çalık Enerji» jáne «Zorlu Holding – Zorlu Enerji» atty iri kompanııalar 50 MVt qýaty bar kún elektr stansııalaryn salýǵa daıyn ekenderin bildirgen. Jobanyń jalpy quny 120 mln. AQSh dollaryn quramaq. Osyndaı nátıjeli kelissózder qorytyndysy boıynsha Túrkistan oblysy ákimdigi men iri túrik kompanııalarynyń arasynda jalpy ınvestısııa kólemi 625 mln. AQSh dollaryn quraıtyn 4 memorandým túzilgen.
Ǵalymjan ELShIBAI,
«Egemen Qazaqstan»
Túrkistan oblysy.
