Ońtústik Koreıanyń prezıdenti Kım De Chjýn, No Mý Hennen keıin 11 jyldan soń prezıdent Mýn Chje In qaıtalap Soltústik Koreıa jerine qadam basty. Soltústik Koreıaǵa túbektiń tynyshtyǵy men beıbitshiligin qalap kelgen Ońtústik Koreı eliniń úsh prezıdenti Kım, No, Mýn - «Demokratııalyq partııanyń» ókilderi. Bul koreı elindegi saıasattyń ózgeshe bir qyryn baıqatady.
Bul joly Mýn Chje In men onyń jubaıy Kım Chjon Sýk hanymdy Kım Chjon Yn tóraǵa men onyń jubaıy Rı Sol Chjý hanym qarsy aldy. Eki eldiń basshysy burynǵy biletin adamdardaı bir-birimen emen-jarqyn amandasyp sóılesti. Bir-birine jol bergenderinen - eki eldiń basshylarynyń dostyǵy jarasa bastady dep aıtýǵa bolady. Ushaqtan túsken Mýn Chje Indi Phenıan halqy áýejaıdan bastap kóshe boıy qol bulǵap qarsy alǵan sátte, qoldaryna eki eldiń týy men túbektiń tutastaı salynǵan kartasy men gúl shoqtaryn ustap shyqty. Mýn men Kım myrza Kım tóraǵanyń kóligine otyryp, Phenıandy aralap, halyqtyń qoshametine bólenip, Kım tóraǵa men ózin qýana qarsy alǵan Soltústik halqyna sheksiz alǵysyn jetkizdi.
Búgingi sammıttiń 1-shi otyrysy saǵat 3 ten 45 mınýt ketkende bastaldy. Ol eki saǵatqa sozyldy. Talqylanǵan máseler týraly eki eldiń úkimeti habarlaıdy. 2-shi otyrys 19 kúni tańerteń jalǵasady. Ásirese, osy 2-shi sammıtte túbekti ıadrolyq qarýdan aryltý máselesi tolyqtaı qarastyrylady dep kútilýde. Odan basqa da búgin belgili bolǵan aqparat boıynsha eki eldiń arasynda bir-birinen aıyrylyp, kóz jazyp qalǵan otbasylardy qaıta tabystyrý máselesin talqylaý jumysy qosyldy. Sonymen qatar Soltústik Koreıadaǵy adam quqyqtary, ıaǵnı áıel men bala quqyǵy da sóz bolady.
Sammıttiń ótetin jeri óte mańyzdy jer. Bul jer eshqashan eshbir álemdik telearnadan kórsetilmegen ǵımarat. Onyń aty - «Choson Eńbek partııasynyń bas ǵımaraty». Koreı tilinde – «조선노동당본부청사» dep jazylady. Bul ǵımarat Kım tóraǵanyń resmı rezıdensııasy. Osy joly eki eldiń beıbitshilikke bastaıtyn sammıtin Kım Chjon Yn óziniń rezıdensııasynda arnaıy ótkizýi – eki eldiń dostyǵy burynǵydan qaraǵandaı birshama jaqyndaı bastaǵandyǵyn aıǵaqtaıdy. Buǵan deıingi sammıtter men kezdesýler bul mańyzdy ǵımaratta atalyp ótken emes. Osy ǵımaratqa at basyn tiregen Mýn Chje In estelik sózi men óz tilegin «Estelik kitabyna» jazyp qaldyrdy. Ol sózdiń maǵynasy «Beıbitshilik pen О́rkendeý, Ulttyń jany bir» - «평화와 번영, 겨레의 마음 하나다» degen sóz jazdy. Osyndaǵy «Ult» dep alǵan sóz eski kóne sózdiń biri. Atalmysh sózdiń maǵynasy tereń. Koreı tilinde «Kıore» degen sózdiń maǵynasy bir atadan taraǵan ult degen maǵynany beredi. Ǵalymdar «Mýn Chje In bul sózdi sapardan buryn oılanyp baryp jazǵandyǵy kórinip tur» degen pikirlerin bildirýde.
О́ziniń bas rezıdensııasynda Mýn Chje Indi qarsy alǵan Kım Chjon Yn «Az da bolsa kópteı kórińiz, biraz jetispeýshilikterimiz bar, shamamyz kelgenshe bárin jasap, kútip alýǵa daıyndaldyq» degen júrek jardy oıyn ashyp aıtyp saldy. Bul Kım tóraǵanyń sózinen Soltústiktiń basshysynyń ashyqtyǵy men óz eliniń ekonomıkalyq áleýeti Ońtústik Koreıa eliniń ekonomıkasymen salystyrýǵa kelmeıtindigin ańǵartady. Eki eldiń arasyndaǵy kezdesýlerdiń deni múmkindiginshe tikeleı efırde kúndelikti Ońtústik pen Soltústik eline kórsetilip jatyr.
Dastan AQASh,
Arnaıy «Egemen Qazaqstan» úshin
Ońtústik Koreıa, Seýl qalasy
