О́tinishter aǵymdaǵy jyldyń qarasha aıynyń alǵashqy jartysyna deıin jobanyń resmı saıty arqyly qabyldanatyn bolady.
«Qazaqstannyń 100 jańa esimin» irikteý barysyna bıylǵy jyly úkimettik emes uıymdar da atsalysady. Osyǵan oraı Almaty qalasy Ishki saıasat basqarmasynyń usynysymen jýrnalıstermen kezdesken «Bolashaq» qaýymdastyǵynyń múshesi, A.Syzǵanov atyndaǵy ǵylymı ortalyqtyń kardıohırýrgy Baýyrjan Rakıshev, jetekshi stýdentterdiń ózin-ózi basqarý G-38 birlestiginiń tóraǵasy Shyńǵys Ersovetov, «Jastar úni» qoǵamdyq birlestiginiń tóraǵasy Dáýren Babamuratov, «Volonterler lıgasy» QQ tóraıymy Aısulý Ernııazova jobaǵa jańa úmitkerlerdi tańdaý barysyna qatysty birqatar jaıttardy ortaǵa saldy.
Respýblıka óńirlerinde elimizdiń damýyna atsalysyp, qoǵamdyq máselelerdi sheshýge óz úlesin qosyp júrgen azamattar jetkilikti. Aldaǵy kezeńde úkimettik emes uıym músheleri ǵylym, bilim, medısına, óndiris oryndary, t.b. salalarda atqarǵan mindetin óziniń azamattyq ustanymy aıasynan shyǵarmaı júrgen jandardy izdestirip, el arasyna shyǵatyn bolady.
Búginde elimizdi halyqaralyq deńgeıde tanytyp júrgen, sportshylar da, óner ókilderi de barshylyq. Osy oraıda Dımash Qudaıbergen, Dmıtrıı Balandın, Jansaıa Ábdimálik sııaqty el maqtanyshyna aınalǵan jastardyń da «Qazaqstannyń 100 jańa esiminiń» qatarynda atalýy keıingi ósip kele jatqan jas urpaqqa úlgi-ónege bolatyny anyq.
Úkimettik emes uıym ókilderi tarapynan usynylǵan úmitkerler joba shartynyń talaptaryna sáıkes irikteledi. Mysaly, ótken jyly elimiz óńirlerinen kelip túsken eki myńǵa jýyq ótinish saraptalyp, ishinen eń úzdikteri tańdaldy. Al bıylǵy jyly da osy talaptar údesinen shyqqan úzdikter 100 esimniń qataryna enetin bolady.
Elvıra SERIKQYZY,
«Egemen Qazaqstan»
ALMATY
