Memleket basshysynyń atyna qazaqstandyqtardan óz qýanyshtary men problemalaryn bólisken, memlekettik merekemen quttyqtaǵan, Ult kóshbasshysynyń Qazaqstandy órkendetýge, turaqtylyqty, beıbitshilik pen kelisimdi nyǵaıtýǵa baǵyttalǵan kórnekti qyzmetin atap ótken hattar kún saıyn tolassyz kelip túsýde, dep habarlady Qazaqstan Respýblıkasy Prezıdentiniń baspasóz qyzmeti.
Mundaı mazmundaǵy hat jas qazaqstandyq, Qazaqstan Respýblıkasy Tuńǵysh Prezıdenti Zııatkerlik mektebiniń túlegi Beket Tólegenovten keldi.
«2010 jyldyń 21 maýsymynda Qazaqstan Respýblıkasy Tuńǵysh Prezıdenti Zııatkerlik mektebiniń úzdik túlegi retinde men Sizben kezdesýge qatysý qurmetine ıe boldym. Áńgimelesý barysynda men ǵarysh ınjeneri bolýdy armandaıtynymdy jáne Qazaqstan álemdegi ǵaryshtyq derjavalardyń biri bolýy úshin qolymnan kelgenniń bárin jasaýǵa tyrysatynymdy aıttym. Oǵan jaýap retinde men Sizdiń ákelik batańyzdy alyp, óz armanymnyń oryndalýyn tilegen ystyq yqylasyńyzǵa ıe boldym», – delingen hatta.
Avtor mektepte alǵan bilimi men «Bolashaq» baǵdarlamasynyń arqasynda óziniń AQSh-tyń NASA, ÁÁK men ÁTK úshin aeroǵaryshtyq sala mamandaryn daıarlaıtyn «Embry-Riddle Aeronautical University» erteden kele jatqan mamandandyrylǵan amerıkalyq ýnıversıtettiń birinshi kýrsyna túskenin atap ótken.
B.Tólegenov osy ýnıversıtette bilim alatyn alǵashqy qazaqstandyq retinde óz Otanyn laıyqty kórsete bilýde. Ol stýdentterge óziniń elin tanystyrý kezinde táýelsiz Qazaqstannyń orasan jetistikteri, onyń ejelgi tarıhy, elde saltanat qurǵan dostyq, beıbitshilik pen kelisimniń qazirgi ahýaly týraly tereńirek aıtyp bergen.
Beket Tólegenov Elbasymen alǵashqy kezdesýinde Ult kóshbasshysy aıtqan myna bir sózder máńgilik kókeıinde saqtalyp qalǵanyn jazady: «Prezıdent ýaqyt tynysyn sezinýi tıis, al dál senderdeı, jastardaı ýaqyt tynysyn eshkim sezine almaıdy». Meniń qyzmetimniń kúrdeliligi sonda, men árqashan da alda júrip, ıdeıalardyń bastamashysy bolyp jáne ony júzege asyrýǵa tıispin. Bul – meniń boryshym ári mindetim». Prezıdent Nursultan Nazarbaevtyń mundaı ómirlik ustanymy jas qazaqstandyqtar úshin zor adamgershilik baǵdarǵa aınaldy.
«Men óz Otanymdy, óz halqymdy jáne onyń Kóshbasshysyn maqtan etemin! Men qol jetkizgen jetistikter árbir qazaqstandyqtyń óz josparyn iske asyrýyna baǵyttalǵan memlekettik saıasattyń nátıjesinde múmkin boldy. Otanymyz – Qazaqstan Respýblıkasynyń odan ári órkendeýi úshin barlyq qolymnan kelgenin jasaımyn dep Sizdi sendiremin. Men Qazaqstan Respýblıkasy Tuńǵysh Prezıdenti Zııatkerlik mektebiniń barlyq túlekteri jáne «Bolashaq» baǵdarlamasynyń stıpendıattary sııaqty ózimdi Sizdiń komandańyzdamyn dep sanaımyn!» delingen B.Tólegenovtiń hatynda.
