Tártip saqshylary káris, nemis, tatar, qazaq, ózbek, armıan halyqtarynyń tilinde sóılep, salt-dástúrleri men ádep-ǵuryptaryn, kıimin, ulttyq bılerin jurtshylyqqa usyndy.
«130-dan astam etnos ókilderi turyp jatqan Qazaqstan jerinde Elbasynyń qoldaýymen Qazaqstan halqynyń tilderi kúni jyl saıyn atap ótiledi. Petropavl qalasynyń ishki ister basqarmasynda «Til – dostyq kópiri» atty is-sharany ótkizý dástúrge aınalǵan. Ondaǵy maqsat– dostyqty, birlikti nasıhattaý», deıdi kadr jumysy bóliminiń jetekshisi Danııar Qaırýllın.
Is-shara barysynda balanyń dúnıege kelýinen úılengenge deıingi ǵuryptar kórsetildi. Bir komanda neke júzigin bálishtiń ishine jasyryp, nemisterdiń qyzǵa usynys jasaý dástúrin beınelese, ekinshi komanda jas jubaılarǵa bal jegizip, aınadaǵy jańa beıneni kórsetip, ózbek halqynyń úılený toıdaǵy rásimderin pash etti. Ár ulttyń taǵamdary da tanystyryldy.
Saıystyń qorytyndysy boıynsha jergilikti polısııa qyzmetiniń ókilderi tapsyrmalardyń barlyǵyn oıdaǵydaı oryndap, úzdik atandy. Olar tatar halqynyń salt-dástúrleri men ádep-ǵuryptaryn kórsetti.
О́mir ESQALI.
«Egemen Qazaqstan».
Soltústik Qazaqstan oblysy
