Eýroodaqtyń qysymy men naryqtyń tepkisine qaramastan, bıliktegi eki basqarýshy partııa jalpy ishki ónimniń 2%-dan joǵary bıýdjet tapshylyǵy jobasyn bekitýge daıyn.
Buǵan deıin vıse-premer, «5 juldyz qozǵalysy» basshysy Lýıdjı Dı Maıo saılaýaldy málimdemelerdi oryndaý men ekonomıkany damytý úshin Úkimet joǵary, alaıda Eýroodaq talaptarynan aspaıtyn, ıaǵnı 3%-dan az bıýdjet tapshylyǵy jobasyn qabyldaýǵa ázir ekenin aıtty.
Bul ustanymdy «Lıga» basshysy, ishki ister mınıstri Matteo Salvını de quptady. Saıasatker bul jolda tek sandar týraly ǵana emes, azamattardyń da jaǵdaıyn umytpaýǵa shaqyrdy.
Italııanyń bıýdjet tapshylyǵynyń shekten shyǵýyna Eýroodaq pen memlekettiń ekonomıka mınıstri Djovannı Trıa qarsy pikir tanytýda. Onyń aıtýynsha, bıýdjet tapshylyǵyn 1,9%-dan ósirý ekonomıkaǵa nuqsan keltirip, memlekettiń qaryz kórsetkishin baqylaýǵa da keri áserin tıgizedi.
Qazirgi tańda Italııanyń memlekettik qaryzy Eýroodaqtaǵy eń joǵarǵylardyń biri. Memleket aımaqtaryndaǵy jumyssyzdyq kórsetkishi 29%-ǵa jetip otyr. Bul rette «Lıga» salyqtyq reforma jasap, jeke tulǵalardyń kiris salyǵynyń mólsherin biryńǵaılaýdy usyndy. Ol jyldyq kirisi 80 myń eýrodan az otbasylarǵa 15%, kirisi 80 myńnan joǵary otbasylar úshin 20%-dy quraýy múmkin.
Italııa úkimeti keler jyldyń bıýdjetin qazannyń 20-na deıin bekitýi kerek.
