Is-sharaǵa Ulttyq ekonomıka jáne Aýyl sharýashylyǵy mınıstrlikteriniń, «Báıterek» UBH» AQ, «Samuryq-Qazyna» UÁQ» AQ, «Kazakh Invest» AQ, «Atameken» Ulttyq kásipkerler palatasy, Nazarbaev Ýnıversıtet, «Astana» halyqaralyq qarjy ortalyǵynyń resmı ókilderi, memlekettik saýda uıymdarynyń jáne eki eldiń iri kompanııalarynyń basshylary qatysty.
Otyrys barysynda Keńeske qatysýshylar Qazaqstanda bıznes júrgizý múmkindikteri týraly tájirıbelerimen jáne oılarymen bólisti. Sonymen birge Qazaqstannyń bıznesti qoldaýǵa, ınvestısııalardy qorǵaýǵa, otandyq jáne sheteldik kompanııalardyń teń jaǵdaılaryn qamtamasyz etýge arnalǵan qarjy quraldaryn jetildirýge baǵyttalǵan saıasatyna erekshe nazar aýdaryldy.
Kezdesý barysynda Qazaqstan tarapynan Iskerlik keńestiń teń tóraǵasy, «Báıterek» UBH» AQ Basqarma tóraǵasy Aıdar Áriphanov atap ótkendeı, «Qazaqstan-Ispanııa» Iskerlik keńesi sheńberindegi kelissózderge 40-tan astam ıspanııalyq jáne 60 qazaqstandyq kompanııa qatysty.
– Qazaqstan naryǵynda kópten beri jumys istep kele jatqan birqatar ıspanııalyq kompanııalar bar. Bizdiń mindetimiz – Qazaqstanǵa jańa kompanııalar tartý jáne saýda salasyndaǵy yntymaqtastyqty nyǵaıtý. Sonymen qatar birlesken kásiporyndar qurý jáne birlesken jobalardy, ásirese memleket-jekemenshik áriptestigine qatysty jobalardy júzege asyrý bolyp tabylady, dedi Iskerlik keńestiń 5-shi otyrysynda Qazaqstan-Ispanııa úkimetaralyq komıssııasynyń teń tóraǵasy, Ispanııanyń saýda jónindegi memlekettik hatshysy Ksıana Mendes.
Iskerlik keńes barysynda «Báıterek» holdıngi eki memorandýmǵa qol qoıdy. Onyń birinshisi Ispanııa Koroldiginiń Saýda jónindegi memlekettik hatshylyǵymen ındýstrıaldyq jáne ınfraqurylymdyq jobalardy qoldaý, iske asyrý jáne birlesip ınvestısııalaý salasyndaǵy yntymaqtastyqqa baǵyttalǵan. Ekinshi memorandým, ıspanııalyq kompanııa tarapynan ınfraqurylym, telekommýnıkasııa, týrızm, agroónerkásip jáne «jasyl energetıka» salalaryndaǵy eksporttyq sharalar yntymaqtastyǵyna baǵyttalǵan COFIDES-ti damytýdy qarjylandyrý bolyp tabylady.
Sonymen qatar forým sheńberinde «Kazakhstan Project Preparation Fund» JShS («Báıterek» holdınginiń enshiles uıymy») jáne «E-Jasyl» JShS Qazaqstan aýmaǵyndaǵy qoqys óńdeıtin zaýyttar qurylysy salasyndaǵy ıspanııalyq tarappen yntymaqtastyqqa baǵyttalǵan О́zara túsinistik týraly memorandýmǵa qol qoıyldy. Osy memorandým aıasynda elimizdiń aýmaǵynda jalpy quny 150 mıllıon eýro bolatyn qoqys óńdeıtin 9 nysan salynbaq.
Jylqybaı JAǴYPARULY,
«Egemen Qazaqstan»
