Forým jumysyna Kásipodaq Federasııasynyń Tóraǵasy Baqytjan Ábdiraıymov, Jambyl oblysynyń ákimi Asqar Myrzahmetov, Qazaqstan Respýblıkasy Tuńǵysh Prezıdenti - Elbasy Qory Atqarýshy dırektorynyń orynbasary Igor Rogov, Parlament Májilisiniń depýtaty Darhan Myńbaı jáne elimizdiń árbir óńirinen kelgen jastar qatysty. Atalǵan forým aıasynda «Zamanaýı áleýmettik-eńbek qatynastary. Qazaqstannyń teorııasy men tájirıbesi» taqyrybynda ǵylymı-tájirıbelik konferensııa uıymdastyryldy.
Respýblıkalyq jıyndy Baqytjan Ábdiraıymov ashyp, júrgizip otyrdy. Áýeli sóz alǵan Asqar Myrzahmetov Elbasy tapsyrmasymen Jambyl óńirinde jastarǵa tıisti kóńil bólinip jatqanyn, jastardyń básekege qabilettiligin arttyrý maqsatynda kóterme járdemaqyǵa 1 mıllıard teńge bólinip otyrǵanyn jetkizdi.
«Jastardyń básekege qabiletti bolyp qalyptasýy qoǵam úshin mańyzdy. Sonymen qatar, búgingi tańda eńbek máselesi jastar úshin sheshýshi ról atqarýda. Jastar ǵylym men jetistikti ushtastyrý arqyly naqty nátıjege qol jetkize alady. Al eń basty másele - eljandy, patrıot azamattardy tárbıeleý. Osyny ylǵı da este saqtaý kerek. Otandy súıe bilý - úlken qasıet. Muny da jastar umytpaýy kerek», dedi ákim. Al óz sózinde Igor Rogov jastardy jumyspen qamtýdyń mańyzdylyǵyna toqtaldy. Jıyn barysynda sóz sóılegen Darhan Myńbaı elimizde qolǵa alynǵan sıfrlandyrý júıesiniń álemdik trend ekenin, sonymen qatar bul aıada biraz mamandyqtardyń ózgeretinin, bul kásiptik deńgeıdiń joǵary satysy ekenin atap ótti.
«Jastar izdenýge, jańashyldyqqa kóp mán berý kerek. Elbasynyń «Prezıdenttiń bes áleýmettik bastamasy» atty halyqqa Úndeýi de jastarǵa arnalǵan. Bolashaqta eńbek jastary qandaı bolýy kerek? Elimizdegi túrli bastamalarǵa olardyń kózqarasy qandaı? Barlyq jastardyń ózindik pikiri qalyptasýy kerek», dedi depýtat. Sonymen qatar, jıynda sóz alǵan «Qazfosfat» JShS bas dırektory, Qazaqstannyń Eńbek Eri Muqash Eskendirov atalǵan kásiporynnyń jastarǵa tıisti kóńil bólip, olardy jumysqa qabyldaý arqyly eńbek jastarynyń belsendiligin arttyrýǵa úles qosyp otyrǵanyn jetkizse, Qazaqstan Respýblıkasy Qoǵamdyq damý mınıstrligi jastar jáne otbasy komıteti tóraǵasynyń mindetin atqarýshy Ashat Oralov elimizde 4 mıllıonǵa jýyq jastar bar ekenin, bir ǵana «Jasyl El» baǵdarlamasy boıynsha ótken jyly respýblıka boıynsha 25 myń jastyń jumyspen qamtylǵanyn, onyń ishinde myńnan astam jastyń jambyldyq ekenin, sonymen qatar «Serpin» baǵdarlamasy arqyly Jambyl oblysynan 820 jastyń bilim alyp jatqanyn aıtyp ótti. Al konferensııa sońynda jastar qaýymy tıisti tulǵalarǵa suraqtar qoıyp, naqty jaýaptar aldy.
Budan keıin qoǵamnyń áleýmettik standarttaryn kóterý jónindegi sessııa ótti. Munda Ulttyq bilim jáne ınnovasııa palatasynyń tóraǵasy Murat Ábenov, Parlament Májilisiniń depýtaty Gennadıı Shıpovskıh, «Jastar úni» AQU Tóraǵasy, QR Prezıdenti janyndaǵy Jastar saıasaty jónindegi keńes múshesi Dáýren Babamuratov, PhD doktor, Qazaq Memlekettik Zań ýnıversıtetiniń dosenti jáne PhD doktory Beıbigúl Nurasheva, L.N.Gýmılev atyndaǵy Eýrazııa ulttyq ýnıversıtetiniń azamattyq jáne ekologııalyq quqyq kafedrasynyń aǵa oqytýshysy Mýslım Hasenov jastarmen pikir almasty.
27 qyrkúıek kúni mereıli Merki jerinde bastaý alǵan Eńbek jastarynyń respýblıkalyq forýmy 29 qyrkúıek kúni aıaqtalady. Úsh kúndi qamtyǵan forým aıasynda elimizdiń árbir óńirinen kelgen jastar eńbek týraly erekshe oı túıip qaıtatynyna senim mol. Forým barysynda uıymdastyrylǵan Kásipodaq kóshbasshysy mektebi aıasynda motıvasııalyq sessııa, ujymdyq standartty qalyptastyrý jónindegi strategııalyq sessııa jumystary da jastarǵa kóp nárse beredi. Al forýmnyń sońǵy kúni jastar Merki óńirine etnojoryqqa shyǵyp, tarıhy men tabıǵatyn tamashalaıtyn bolady.
Hamıt ESAMAN,
«Egemen Qazaqstan»
Jambyl oblysy
Merki aýdany
