Kitaphana isi mamandarynyń bilimi men kásibıligin arttyrý maqsatynda «Jas Otan» Jastar qanaty men Nazarbaev Ýnıversıteti kitaphanalardyń zamanaýı ózgeristerge beıimdelýi men jańa formatta qyzmet kórsetýi boıynsha semınarlar men tájirıbelik trenıngter ótkizedi.
Shara barysynda Nazarbaev Ýnıversıteti kitaphanasynyń bas sarapshysy, Belorýs kitaphana assosıasııasy Keńesiniń Tóraǵasy Petr Lapo bes kún boıy qatysýshylarǵa aımaqtaǵy kitaphanalardyń suranysyn arttyrý joldaryn úıretedi. Sondaı-aq shara barysynda qatysýshylar Nazarbaev Ýnıversıtetiniń stýdentterine arnalǵan jańa kitaphananyń jumysymen de tanysady.
«Jas Otan» Jastar qanatynyń Tóraǵasy Danııar Súndetbaev bul sharanyń aımaqtyq kitaphanalardyń jańǵyrý jolynda jasalǵan úlken qadam ekenin atap ótti: «Qatysýshylar osy semınar-trenıng nátıjesinde óz aımaqtarynda qoǵamdyq kitaphanalardyń jumysyn zamanaýı talaptarǵa saı túrlendirýge qadam jasap, alǵan bilimderimen óz óńirlerindegi áriptesterimen blisedi dep senemiz. Qazirgi zamannyń kitaphanalary jastardyń bilimin tolyqtyrýǵa, jańa dostar tabýǵa múmkindik beretin, bos ýaqytyn tıimdi ótkizetin jastar alańdaryna aınalýy tıis».
«Jas Otan» naýryz aıynda ótken Sezinen keıin kitaphanalardy jastardyń qajettiligine jaýap beretin zamanaýı bilim ortalyqtaryna aınaldyrýdy qolǵa aldy. Uıym jyl sońyna deıin barlyq oblys ortalyqtarynda qoǵamdyq kitaphanalardan zamanaýı jastarǵa arnalǵan koýorkıng zonalaryn ashýdy josparlap otyr.
Qatysýshylardyń biri Shymkent qalasynyń ortalyqtandyrylǵan kópshilik kitaphanalar júıesiniń dırektory Shatyrbekova Gúlsim sharanyń kitaphanashylarǵa berer paıdasy týraly oıymen bólisti: «О́ńirlerdegi kitaphanalarǵa jańa ómir berý kerek ekenin túsinemiz. Bizde bar resýrstardy jastar keńinen qoldanýy úshin ne isteý kerek, kitaphana menedjmenti, kitaphana jumysyn jańa formatqa, zamanaýı suranysqa saı beıimdeý taqyryptaryn aldaǵy semınarlar men trenıngterde talqylaıtyn bolamyz. Jańa bilim alyp qana qoımaı, ózge óńirlerden kelgen áriptesterimizben tanysyp, ózara tájirıbe almasýǵa da múmkindik beredi».
