Azııa qurlyǵynda tuńǵysh ret ótkizilgen jıynda aýyz sý tapshylyǵy máselesi jan-jaqty sóz boldy. Sharany beınejoldaý arqyly quttyqtaý sózimen ashqan Elbasy Nursultan Nazarbaev qatysýshylarǵa sessııa mańyzdylyǵy týraly aıtyp, halyqty jáne halyqqa qajet áleýmettik-ekonomıkalyq salalardy sýmen qamtý, atalǵan salaǵa tyń tehnologııalardy engizý, ınvestısııa tartý, sý qorlaryn zııandy qaldyqtardan tazartý jáne bilikti mamandar daıyndaý syndy túıitkildi máselelerdi nazarǵa aldy.
Sharaǵa qatysýshy resmı delegasııa quramynda alys-jaqyn shet memleketterdiń mınıstrlikteri men agenttikteriniń basshylary boldy. BUU Eýropalyq ekonomıkalyq komıssııasynyń atqarýshy hatshysy Olga Algaerova baıandama jasap, uıymnyń Bas hatshysy Antonıý Gýterrısh joldaǵan quttyqtaý sózdi oqyp berdi. Jıynda sóz alǵan basqa da baıandamashylar joldaǵan sý máselesin sheshýdegi ózara yntymaqtastyqtyń mán-mańyzyn erekshe atap ótti.
Jalpy álemdegi 260 shekaraaralyq sý basseıni jer sharynyń teń jartysyn qurasa, bul aýmaqtyń 40 prosentinde adamdar ómir súredi. Iаǵnı, jyl saıyn jer-jahandy taza aýyz sýmen qamtý máselesi qordalanyp keledi degen sóz. Jıynǵa qatysýshylar bul máseleni sheshý úshin jumyla jumys atqarý qajettigin aıtady.
Qazaqstan atalǵan konvensııaǵa bıyl úshinshi márte tóraǵalyq etip otyrǵanyn atap ótken jón. Segizinshi sessııa barysynda 2019-2021 jyldarǵa arnalǵan strategııa men baǵdarlama qabyldanady dep josparlanǵan.
Atalǵan baǵdarlama negizinde transshekaralyq ózenderdiń sý resýrstaryn qorǵaý jáne paıdalaný máselesi qarastyrylyp, bul salaǵa ınvestısııa tartý jolǵa qoıylmaq. Sondaı-aq sý sektorynda eldiń ǵylymı jáne ınstıtýsıonaldyq áleýetin kúsheıtýge basymdyq berilmek. Shekaraaralyq sýlar týraly konvensııa 1996 jyly qabyldandy jáne oǵan BUU-ǵa múshe elder qatysa alady.
Erkejan AITQAZY,
«Egemen Qazaqstan»
